Xorazmda IIB xodimi o‘z joniga qasd qildi

Xorazm viloyati Yangiariq tuman IIB xodimi U.R. o‘z joniga qasd qildi. Bu haqda viloyat prokuraturasi matbuot xizmati xabar berdi.

Qayd etilishicha, u 26-noyabr kuni tuman IIB binosida xizmat quroli orqali o‘z joniga qasd qilgan. Dastlabki ma’lumotlarga ko‘ra, IIB xodimining o‘z joniga qasd qilishiga oilaviy kelishmovchilik oqibatida kelib chiqqan ruhiy siqilish sabab bo‘lgan.

Bosh prokuratura matbuot xizmatining “Daryo” so‘rovi bo‘yicha ma’lum qilishicha, u 26-noyabr kuni soat 08:50 larda tuman IIB binosining navbatchilik qismi xonasining maxsus vositalarni saqlash xonasida navbatchi R.Yu.ga biriktirilgan “PM” pistoleti bilan o‘zining qorin va bosh qismiga otgan.

Xodim Yangiariq tuman tibbiyot birlashmasiga olib kelingan va ko‘rsatilgan tibbiy yordamga qaramasdan vafot etgan. Sud-tibbiy ekspertining dastlabki ma’lumotiga ko‘ra, xodimning o‘limiga olgan tan jarohati oqibatida yuzaga kelgan ichki va tashqi qon ketish sabab bo‘lgan.

Dastlabki ma’lumotlarga ko‘ra, U.R.ning o‘z joniga qasd qilishiga oilaviy kelishmovchilik, xususan turmush o‘rtog‘ining 2 oy avval farzandlarini olib otasining uyiga ketib qolgani oqibatida kelib chiqqan ruhiy siqilish sabab bo‘lgan.

Holat yuzasidan Yangiariq tuman prokuraturasi tomonidan tergovga qadar tekshiruv harakatlari olib borilmoqda. Tekshiruv viloyat prokuraturasi tomonidan nazoratga olingan.