Rossiyaning 23-noyabrdagi raketa zarbalari oqibatida Ukrainada atom elektr stansiyalarining (AES) asosiy elektr ta’minoti uzildi, ular avariya holatiga o‘tkazildi. Bunday hujumlarning yana amalga oshirilishi yadroviy falokatga olib kelishi mumkin, deb yozmoqda The Guardian.
Ukraina “Energoatom” prezidenti Petr Kotinning so‘zlariga ko‘ra, 23-noyabr Rossiyaning raketa hujumlari vaqtida Ukraina AESning barcha xavfsizlik mexanizmlari to‘g‘ri ishlagan, biroq ikkita generator shikastlangan. Oqibatda ikkita reaktorni qayta ishga tushirish kechikkan. Rossiyaning yangi raketa zarbalari AESga jiddiy zarar yetkazishi mumkin, bu esa Ukrainaning energiya ta’minoti va ehtimol yadro xavfsizligiga jiddiy ta’sir ko‘rsatadi.
Yevropaning eng yirik atom elektr stansiyasi, Zaporojye AES, mart oyida Rossiya qo‘shinlari tomonidan egallab olingandi, sentabrda esa stansiya atrofidagi hududlarning tez-tez o‘qqa tutilishi sababli faoliyati to‘xtatilgandi. Ukrainadagi yana uchta atom elektr stansiyalari, Rivne, Janubiy Ukraina va Xmelnitskiy, yaqinda Rossiyaning Ukraina bergan raketa hujumining bilvosita nishoniga aylangan.
Shu bilan birga, yuqori voltli elektr uzatish liniyalari, transformatorlar va podstansiyalarga raketa hujumlari barcha AESning bir vaqtning o‘zida birinchi marta favqulodda to‘xtab qolishiga olib kelgan.
Atom energiyasi bo‘yicha xalqaro agentlik (MAGATE) bosh direktori Rafael Mariano Grossining so‘zlariga ko‘ra, Ukraina AESning tashqi energiya ta’minoti to‘liq va bir vaqtning o‘zida uzilishi Ukrainadagi yadro xavfsizligi bilan bog‘liq vaziyat tobora beqaror va potensial xavfli bo‘lib borayotganini ko‘rsatadi. Mutaxassislar AESning tez-tez favqulodda to‘xtab qolishi stansiyalarda avariyalarga olib kelishi mumkinligini prognoz qilgan.
MAGATE Rossiyani Zaporojye AESdan chiqib ketishga chaqiruvchi rezolyutsiya qabul qilgandi. Shuningdek, agentlik Ukrainadagi Chernobil va boshqa AESlarni tekshirish uchun missiya yuborishini ma‘lum qilgan.
Izoh (0)