Qirolicha Yelizaveta II saraton sababli vafot etgani ma’lum qilindi

Buyuk Britaniya qirolichasi Yelizaveta II hayotining so‘nggi yillarida saraton kasalligi bilan kurashdi. Bu haqda qirollik biografi, shahzoda Filippning yaqin do‘sti Jayils Brandretga tayanib, Independent xabar berdi.

Yelizaveta II ning o‘limi sababi “keksalik” sifatida ko‘rsatilganiga qaramay, Brandret aslida monarxning hayotiga suyak iligi saratonining kam uchraydigan shakli sabab bo‘lganini aytdi.

“Bu tashxis uning tez charchashi, vazn yo‘qotishi va hayotining so‘nggi yilida harakatlanishi bilan bog‘liq muammolardan darak beradi”, — deydi biograf.

Brandretning ta‘kidlashicha, kasallikning eng ko‘p uchraydigan alomati ayniqsa tos va belda yuzaga keladigan suyak og‘rig‘i hisoblanadi. Simptomlarning og‘ir kechishini kamaytiradigan va hayotni 2-3 yilga uzaytiradigan maxsus terapiya mavjudligi qayd etilgan.

Eslatib o‘tamiz, Britaniya qirolichasi Yelizaveta II 2022-yil 8-sentabr kuni 96 yoshida Shotlandiyadagi Balmoral qasridagi qarorgohida vafot etdi. Qirolicha vafotidan keyin uning to‘ng‘ich o‘g‘li Charlz qonun bo‘yicha yangi monarx bo‘ldi.

Mavzuga doir:

• Nima uchun Yelizaveta II o‘z o‘limiga yoshligidan tayyorgarlik ko‘ra boshlagan?
• Yelizaveta II ning uzoq umr ko‘rish sirlari haqida maqola chop etildi
• Yelizaveta II ning vafotidan keyin hindistonliklar “Ko‘hinur” olmosini qaytarishni talab qildi