Путин яна бир давлатга бостириб киришга тайёргарлик кўрган, бироқ тўсатдан фикрини ўзгартирган — Newsweek

Россия 2021 йилнинг ёзида, Украинага бостириб киришидан бир неча ой олдин Японияга ҳужум қилишга тайёрланаётган эди. Бу ҳақда Американинг Newsweek нашри хабар берди.

Нашрга Россия хавфсизлик хизмати билан ҳамкорлик қилувчи шахс томонидан ёзилган мактуб келиб тушган. Электрон хабар 17 март санаси билан «Ўзгаришлар шамоли» тахаллусли агент томонидан россиялик ҳуқуқ ҳимоячиси ва ҳозирда Францияда сургунда бўлган Владимир Осечкинга юборилган.

Хаt Bellingcat разведка гуруҳи эксперти Христо Грозев томонидан таҳлил қилинган. У мактубни «Россия хавфсизлик хизматига алоқадор (ҳозирги ёки собиқ) икки  кишига кўрсатган, улар хат «ҳамкасблари томонидан ёзилганига шубҳа қилмаслигини» айтган.

2021 йил августида Россия «Япония билан ҳарбий можарога жиддий тайёргарлик кўраётган эди», дейилади хатда.

Россия хавфсизлик хизмати ходими бунинг ўрнига Россия бир неча ойдан кейин Украинага бостириб киришга қарор қилганини қайд этган.

«Мамлакатлар кескин қарама-қаршилик ва ҳатто уруш босқичига киришига ишонч юқори эди. Якунда уруш учун Украина танланди», — деб ёзади у.

Манба радиоэлектрон уруш вертолётларининг Японияга қаратилган ҳаракатини батафсил тасвирлаб берган, японларни ҳам Россия оммавий ахборот воситаларида «нацистлар» ва «фашистлар» деб эълон қилишга тайёрланганини айтган.

Хаt эгасининг таъкидлашича, хавфсизлик хизмат гўёки «Россия жамиятида Японияга қарши ахборот кампаниясини» бошлаш вазифасини олган.

«У японлар гўёки шафқатсиз биологик тажрибаларга ихтисослашгани, ғайриинсонийлиги ва натсизмга мойил бўлганига қаратилган эди. Россия Япония бўйича режаларини Украинага алмаштирди. Бу иккала ҳолатда ҳам шунчаки ақлдан озиш ҳисобланади. Аммо раҳбариятнинг ҳужумга бўлган истаги туфайли Россия учун уруш муқаррар эди. Оқибатда жанговар тайёр бўлинмаларнинг асосий қисми Украинага кўчирилди», дейилади мактубда.

Newsweek нашри Россия ва Япония ташқи ишлар вазирликларига изоҳ беришлари учун мурожаат қилган, аммо ҳозирча улардан тегишли жавоб келмаган.

Мавзуга доир: Россияда бошқарув йўқолиб, тартибсизлик юзага келиши мумкин — The Economist