Экваториал Гвинея халқи Теодоро Обианг Нгема Мбасогони қайта президент этиб сайлади. Бу ҳақда Reuters хабар берди.
Сиёсатчи қаторасига олтинчи марта давлат раҳбари лавозимини эгаллайди. Миллий сайлов комиссияси маълумотига кўра, у сайловда 94,9 фоиз овоз олган. Сайловда иштирок этганлар 98 фоизини ташкил қилган. У 1979 йилда Экваториал Гвинеяда амакисини бошқарувдан ағдариб, ҳокимият тепасига келган. 2016 йилда сиёсатчи сайловларда 93,7 фоиз овоз олган.
Абадий президент
Тахминан 1,5 миллион аҳолига эга Ғарбий Африка давлати 1968 йилда Испаниядан мустақилликка эришганидан бери бор-йўғи икки нафар президентга эга бўлди. Обианг 1979 йилда тўнтариш натижасида амакиси Франциско Макиас Нгуэмани ҳокимиятдан четлатган.
43 йилдан ортиқ ҳукмронлик қилган Обианг монархларни ҳисобга олмаганда, дунёдаги энг узоқ вақт ҳукмронлик қилган давлат раҳбари ҳисобланади. 80 ёшли сиёсат сайловларда ҳеч қачон 93 фоиздан кам овоз олмаган.
Ҳуқуқ фаоллари Экваториал Гвинея президентини мухолифатни ва рақибларни бостиришда айблайди. Мамлакатда намойишлар тақиқланган, оммавий ахборот воситалари эса қаттиқ назорат остида. Сиёсий рақиблар кўпинча ҳибсга олинади ва қийноққа солинади, дейди танқидчилар.
Нефть бойлиги ва коррупция
1990 йилларнинг ўрталарида денгизда нефтнинг аниқланиши Экваториал Гвинеяни 2021 йилда аҳоли жон бошига тўғри келадиган даромадлар бўйича Саҳрои Кабирдан жанубий Африканинг учинчи энг бой давлатига айлантирди.
Бироқ бойлик бир нечта оилалар қўлида тўпланган. Мамлакат, шунингдек, Transparency International ташкилотининг 2021 йилги «Коррупцияни қабул қилиш» индексида 180 мамлакат ичида 172-ўринни эгаллаган.
Президентнинг ўғли, потенциал ворис сифатида кўрилаётган вице-президент Теодоро Нгуэма Обианг Мангуэ 2020 йилда Франция суди томонидан давлат маблағларини ўғирлашда айбланган.
Изоҳ (0)