Moskvada Kreml binosi atrofida Federal qo‘riqlov xizmatining o‘nlab soqchilari va qo‘shimcha politsiya patruli navbatchilik qilmoqda, deb yozadi Baza Telegram-kanali. Kreml devoriga “Urushga qarshimiz” deb yozib ketishganidan keyin shunday choralar ko‘rilgani aytilmoqda.
“Moskvada Kreml devorlaridan biriga noma’lum shaxs ‘Urushga qarshimiz’ degan shiorni yozib ketgan. O‘shandan beri Rossiya Federatsiyasi prezidenti rasmiy qarorgohi yonida qurollangan xavfsizlik xodimlari paydo bo‘lib, Kreml devorlarini diqqat bilan qo‘riqlamoqda”, — deyiladi xabarda.
Ta’kidlanishicha, Kreml devoridagi graffiti tezkorlik bilan o‘chirib tashlangan va shunday tezlikda patrul ham qo‘yilgan. Kreml atrofida avtomatlar va to‘pponchalar bilan qurollangan uchta politsiya patruli kecha-yu kunduz navbatchilik qilmoqda.
Rossiyada urushga qarshi yozuvlarni joylashtirgan kishilar Rossiya armiyasini obro‘sizlantirish haqidagi modda bo‘yicha qo‘lga olinishi va jarimaga tortilishi mumkin.
Izoh (0)