Eron Iroq chegarasiga kurdlarga qarshi zirhli tank va qo‘shinlar yubormoqda (video)

Eron Inqilobiy gvardiyasi Kurdiston muxtoriyatiga tutashgan Iroq bilan chegaraga zirhli tanklar joylashtirib, qo‘shinlar yubormoqda. Bu haqda Reuters xabar berdi.

Eron quruqlikdagi kuchlari qo‘mondoni Muhammad Pakpurga ko‘ra, chegara qo‘shinlarini kuchaytirish “Iroq Kurdistonida joylashgan kurd guruhlarining mamlakatga kirib kelishining” oldini oladi. Tehron 24-noyabr kuni Birlashgan Millatlar Tashkilotiga Iroqdagi kurd isyonchi guruhlariga zarba berib, o‘zini himoya qilishdan boshqa chorasi yo‘qligini ma’lum qilgan.

“Inqilobiy gvardiya armiyasining zirhli va maxsus bo‘linmalari mamlakatning g‘arbiy va shimoli-g‘arbiy chegaralari tomon harakatlanmoqda. Bu Iroqning shimoliy mintaqasida faoliyat yuritayotgan separatistik guruhlarga aloqador terrorchilarning kirib kelishining oldini olishga qaratilgan”, — deydi general Pakpur.

Kurd guruhi Eronda hijobni noto‘g‘ri o‘ragani uchun hibsga olingan va o‘lgan Mahsa Aminining o‘limi tufayli boshlangan norozilik namoyishlarini qo‘zg‘atishda ayblanmoqda. Eron so‘nggi kunlarda Iroq shimolidagi kurd qurolli guruhi bazalariga ikki marta raketa va dronlardan zarbalar bergan.

22-noyabr kuni Pakpur Eron armiyasining “terrorchi guruh bazalari” yaqinidagi aholiga operatsiya paytida jarohatlanmasligi uchun evakuatsiya qilishni maslahat bergan.

Erondan kelgan kurd guruhlari Iroq shimolidagi avtonom Kurdiston hududlariga joylashgan. Tehron ularni bir necha bor Aminining Tehronda ayollar uchun kiyinish qoidalarini buzganlikda ayblanib hibsga olinishi ortidan 16-sentabr kuni hibsda vafot etganidan keyin boshlangan umummilliy tartibsizliklarni kuchaytirganlikda ayblagan.

Erondagi namoyishlarga nima sabab bo‘ldi?

Keyinroq Aminiyning akasi ma’lum qilishicha, politsiyachilar u bilan “qayta tarbiyalash” ishlarini o‘tkazishga va’da bergan. Politsiya uchastkasidan qiz tez yordam mashinasida olib ketilgan. Shifokorlar qizda yurak xuruji va insult yuz berganini bildirgan, u bir necha kundan keyin vafot etgan. Eron politsiyasi baxtsiz hodisa yuz berganini da’vo qilmoqda.

Eron hukumati fikricha, noroziliklar “islom rejimini zaiflashtirish bo‘yicha dushman strategiyasi”ning bir qismidir, mamlakat armiyasi esa namoyishlar fonida “dushmanlarga qarshi kurashish” va xavfsizlikni ta’minlash niyatida.

Eron oliy yetakchisi Ali Xomanaiy namoyishlar “oddiy eronliklar” tomonidan o‘tkazilmayotganini, balki oldindan rejalashtirilganini aytgandi, shuningdek, u AQSH va Isroilni tartibsizliklarni tashkillashtirishda ayblagan.

O‘z navbatida, Eron hukumati tartibsizliklarga aloqador olti kishini o‘limga hukm qilgan.