Ukrainaga bostirib kirganidan beri o‘tgan to‘qqiz oy ichida Rossiya urushga 82 milliard dollar yoki budjet yillik daromadlarining chorak qismini sarflagan. Ukrainaning Forbes nashri hisob-kitoblari shundan darak bermoqda.
Bu raqamlar faqat jangovar harakatlarni qo‘llab-quvvatlab turish uchun zarur bo‘lgan bevosita xarajatlarni o‘z ichiga oladi. Mudofaa uchun doimiy chiqimlar hamda Rossiya iqtisodiyotining urush va sanksiyalar tufayli talafotlari hisobga olinmagan.
2021-yilda Rossiya budjet daromadlarining barchasi dollar ekvivalentida 340 milliardni tashkil qilgan.
Nashr hisob-kitoblari bo‘yicha kuzda Rossiya urushga bir oyda kamida 10 milliard dollar sarflagan — bu istilo boshidagi ko‘rsatkichdan ikki marta ko‘p demakdir. Xarajatlar safarbarlikdan keyin keskin oshgan, deb hisoblaydi Forbes — harbiy xizmatga ko‘proq odamlar chaqirildi, shu sababli urushda qatnashayotganlar uchun pul to‘lovlari, ular uchun yarog‘-aslaha va qurolga xarajatlar, shuningdek, qurbonlarning oilalari va jabrlanganlarga tovon puli uchun chiqimlar oshib ketgan.
Shuningdek, urush xarajatlarining katta qismi — 14 milliard dollardan ziyodi raketa zarbalariga to‘g‘ri kelgan. Taxminiy hisob-kitoblarga ko‘ra, to‘qqiz oy mobaynida to‘rt mingdan ortiq raketa uchirilgan bo‘lib, har birining o‘rtacha narxi qariyb uch million dollarga teng. Artilleriya o‘qlariga, Forbes fikricha, deyarli 5,5 milliard dollar sarflangan.
Nashr Rossiya armiyasining texnika talafotlarini (birinchi o‘rinda tanklar va samolyotlar) 20,8 milliard dollarga baholadi.
Urushga xarajatlar o‘sib bormoqda, ammo Rossiya budjetiga energiya manbalari sotuvidan tushumlar kamaymoqda, deyiladi nashr xabarida. Ta’kidlanishicha, 2023-yilda Rossiya budjeti bunday yuklamani eplay olmasligi mumkin.
Ukrainaning Forbes nashri o‘z hisob-kitoblari uchun Ukraina qurolli kuchlari bosh shtabining Rossiya armiyasi texnika va askarlar bo‘yicha talafotlari, shuningdek, uchirilgan raketalar soni va artilleriya zarbalari shiddati haqidagi ma’lumotlaridan foydalandi.
Izoh (0)