NATO bosh kotibi Yens Stoltenberg qishning boshlanishi Ukraina uchun “dahshatli” bo‘ladi, degan fikrda. Uning so‘zlariga ko‘ra, 29—30-noyabr kunlari Buxarestda bo‘lib o‘tadigan yig‘ilishda alyansga a’zo davlatlar tashqi ishlar vazirlari Kiyevga qishki kiyim-kechak, yonilg‘i va dori-darmonlardan iborat yordamni oshirish bo‘yicha qaror qabul qiladi. Bundan tashqari Stoltenberg, Ukraina uchun NATO eshiklari ochiqligini ta’kidladi.
“Shafqatsizlik, shaharlar va fuqarolik infratuzilmalariga raketa hujumlari kuchaymoqda, bu esa ukrainaliklarni issiqlik, yorug‘lik va oziq-ovqatdan mahrum qilmoqda. Bu Ukraina uchun qishning dahshatli boshlanishi”, — dedi alyans bosh kotibi Buxarestdagi uchrashuv oldidan bo‘lib o‘tgan matbuot anjumanida.
Stoltenbergning so‘lariga ko‘ra, mojaroni tinch yo‘l bilan hal qilish imkoniyatlarini oshirishning eng yaxshi yo‘li Ukrainaga yordam ko‘rsatishdir. U Buxarestdagi uchrashuvda tashqi ishlar vazirlarining gumanitar yordam yetkazishni oshirishga kelishib olishini kutmoqda.
Ukrainaning NATOga qo‘shilish imkoniyati haqidagi savolga javoban bosh kotib so‘nggi yillarda alyans Chernogoriya va Shimoliy Makedoniyani qabul qilganini, 2022-yilda esa Finlyandiya va Shvetsiya NATOga taklif qilinganini eslatdi. “Bu qarorlar bilan biz NATO eshiklari ochiqligini va Rossiya NATOning kengayishi bo‘yicha veto huquqiga ega emasligini ko‘rsatdik. Bu xabar Ukrainaga ham taalluqli”, — ta’kidladi Stoltenberg.
Bosh kotib, shuningdek, alyans a’zolari Shvetsiya va Finlyandiyaning unga kirishini tez orada ratifikatsiya qilishiga ishonch bildirdi.
Ukraina prezidenti Vladimir Zelenskiy Rossiyaning raketa zarbalaridan keyin deyarli barcha hududlarda elektr ta’minotida jiddiy muammolar saqlanib qolayotganini, 15 ta viloyatda esa suv ta’minotida uzilishlar mavjudligini aytdi.
21-noyabr kuni Zelenskiy yana bir bor G‘arb davlatlarini Kiyevning NATO va Yevropa Ittifoqiga qo‘shilish tashabbusini qo‘llab-quvvatlashga chaqirdi. Sentabr oyida Stoltenberg NATOga a’zo bo‘lish uchun ariza tashkilotning barcha a’zolari tomonidan qo‘llab-quvvatlanishi kerakligini ta’kidlagandi.
6-oktabr kuni Yevropa Ittifoqining ichki bozor bo‘yicha komissari Tyerri Breton Ukraina hududida harbiy harakatlar davom etayotgan vaqtda mamlakat NATOga qo‘shila olmasligini aytdi. Alyans qoidalariga ko‘ra, hududiy nizolar hal etilmagan davlatni harbiy blokka qabul qilish mumkin emas.
Izoh (0)