Belarus prezidenti Aleksandr Lukashenko Kollektiv xavfsizlik shartnomasi tashkiloti (KXSHT) buzilmasligini, mustahkamligini ma’lum qildi, biroq tashkilot kelajagi bevosita Rossiyaning Ukrainadagi maxsus operatsiyasi natijasiga bog‘liq bo‘lishi mumkinligini ta’kidladi. Bu haqda “Interfaks” xabar bermoqda.
Yerevanda KXSHTning Kollektiv xavfsizlik kengashi sessiyasida nutq so‘zlar ekan, u so‘nggi vaqtlarda KXSHTning hayoti va taqdiri Rossiyaning Ukrainadagi maxsus operatsiyasiga bog‘liq bo‘lishi haqida fikrlar paydo bo‘layotganini aytdi: “Agar u g‘alaba qozonsa, KXSHT yashashda davom etadi. Agar yutmasa, KXSHT mavjud bo‘lmaydi”.
“Shuni his qilyapmanki, biz bu borada yagona fikrga keldik, ya’ni agar, xudo ko‘rsatmasin, Rossiya qulasa, bizning joyimiz shu vayronalar ostida bo‘ladi”, — dedi Lukashenko.
“Bunday gaplar umuman bo‘lmasligi kerak. Biz harbiy-siyosiy maydondan ketmoqchi emasmiz. KXSHT mavjud bo‘lishda davom etadi, va hech kim hech qayerda qulamaydi. Lekin bizga birdamlik kerak”, — deya qo‘shib qo‘ydi Lukashenko.
KXSHT nima?
Kollektiv xavfsizlik shartnomasi tashkiloti — ayni paytda Armaniston, Belarus, Qozog‘iston, Qirg‘iziston, Rossiya va Tojikistonni o‘z ichiga olgan Yevrosiyo hukumatlararo harbiy ittifoqi. Tashkilotni tuzish haqidagi shartnoma 1992-yil 15-mayda imzolangan.KXSHT maqsadlari tinchlikni, xalqaro va mintaqaviy xavfsizlik va barqarorlikni mustahkamlash, a’zo davlatlar mustaqilligi, hududiy yaxlitligi va suverenitetini kollektiv asosda himoyalashdan iborat.
Izoh (0)