Pashinyan KXSHT sammiti yakunlari bo‘yicha deklaratsiyani imzolashdan bosh tortdi

Armaniston bosh vaziri Nikol Pashinyan Kollektiv xavfsizlik shartnomasi tashkiloti (KXSHT) Kollektiv xavfsizlik kengashining Armanistonga yordam ko‘rsatish bo‘yicha qo‘shma chora-tadbirlar haqidagi deklaratsiyasi loyihasi oxirigacha ishlanmagani tufayli, uni imzolashdan bosh tortdi. Bu haqda Armaniston tomoni majlis yakunlari bo‘yicha ma’lum qildi.

Pashinyan KXSHT Kollektiv xavfsizlik kengashi (KXK) deklaratsiyasini ham imzolamagan, tashkilot bosh kotibi Stanislav Zas hujjat deyarli tayyor ekanini, faqat unga bir qator tuzatishlar kiritish kerakligini aytdi.

“KXSHT ustavining 3-moddasiga muvofiq, a’zo mamlakatlar hududiy yaxlitligini kollektiv tarzda himoya qilish uchun ustuvorlik siyosiy vositalarga beriladi. Shuning uchun Armaniston KXSHT KXK qarori bilan Ozarbayjon tomonidan o‘z qo‘shinlarini zudlik bilan va so‘zsiz ravishda Armaniston Respublikasi hududidan olib ketib, 2021-yil 11-may holatidagi boshlang‘ich pozitsiyalarga joylashtirishga qaratilgan zarur siyosiy-diplomatik ishlar olib borilishini tezlashtirishni taklif qilamiz”, — dedi KXK majlisida Armaniston bosh vaziri.

Vaziyatning siyosiy jihatdan aniq baholanmasligi va yuqorida tilga olingan qarorning qabul qilinmasligi nafaqat KXSHTning ittifoqchilik majburiyatlaridan voz kechishini anglatishi mumkin, balki Ozarbayjon tomonidan “Armanistonga qarshi tajovuzni davom ettirish uchun KXSHT tomonidan yashil chiroq sifatida” talqin qilishi ham mumkin, dedi Nikol Pashinyan.

“Shuning uchun, shundan kelib chiqib, hurmatli hamkasblar, ayni paytda imzolash uchun taqdim etilgan ‘Kollektiv xavfsizlik kengashining Armanistonga yordam ko‘rsatish bo‘yicha qo‘shma chora-tadbirlar haqidagi deklaratsiyasi’ yetarlicha ishlanmagan, deb o‘ylayman va ushbu hujjatlarni bu ko‘rinishida imzolashga tayyor emasman”, — dedi Pashinyan.

Tayyorlangan 17 ta yakuniy hujjatdan ikkitasi qayta ko‘rib chiqishga yuborildi, dedi Armaniston bosh vaziri. “Biz tor doiradagi majlisimizni tugatdik. 17 ta qaror loyihasi taqdim etildi. 15 tasi bo‘yicha bizda konsensus bor. Ikkita loyiha kam-ko‘stini to‘ldirishga yuborildi”, — dedi u. Uning qayd etishicha, taqdim etilgan hujjatlarning ikkitasi imzolanmagan — ularning kam-ko‘stini tuzatib, shundan keyingina imzolash uchun taqdim etish rejalashtirilmoqda.

Ozarbayjon va Armaniston 2020-yil 10-noyabrda Rossiya vositachiligida Tog‘li Qorabog‘da urushni tugatish haqida uch tomonlama bitim imzolagandi. Bu yil esa Ozarbayjon va Armaniston yana bir-birini o‘z pozitsiyalarini o‘qqa tutishda ayblamoqda.