Ukraina va Rossiya harbiy asirlar bilan ayirboshlashdi. Ukrainaga 36 kishi, Rossiyaga 35 kishi qaytib keldi

Rossiya va Ukraina hukumati harbiy asirlar bilan navbatdagi ayirboshlashuvni o‘tkazdi. Bu haqda ikkala tomon vakillari 23-noyabr kuni ma’lum qildi.

З полону РФ визволили ще 36 українців.
відео - з Telegram каналу Андрія Єрмака pic.twitter.com/WpUEsuCB5T

— Українська правда ✌️ (@ukrpravda_news) November 23, 2022

Ukrainaga asirlikdan 35 nafar harbiy va bir nafar oddiy fuqaro qaytib keldi, deb xabar berdi Ukraina prezidenti ofisi rahbari Andrey Yermak. “Ozod etilganlar orasida Mariupolni himoya qilgan yigitlar bor, ba’zilari ‘Azovstal’da bo‘lgan, shuningdek, istiloning ilk kunlarida Chernobil AESda asirga olingan milliy gvardiyachilar ham bor”, — dedi Yermak. Uning so‘zlariga ko‘ra, ozod qilingan oddiy fuqaroning oyog‘i kesib tashlangan.

Rossiya Mudofaa vazirligi, o‘z navbatida, “muzokaralar jarayoni natijasida Kiyev rejimi nazorati ostidagi hududlardan 35 nafar rossiyalik harbiy xizmatchi qaytarilgani”ni ma’lum qildi. Ozod etilgan harbiylar davolanish va reabilitatsiya uchun Moskvaga yuboriladi.

Avvalroq Rossiya tomonidan bosib olingan DXR rahbari etib tayinlangan Denis Pushilin 23-noyabr kuni “35 ga 35 formulasi bo‘yicha” asirlar bilan ayirboshlashuv bo‘lib o‘tganini aytgandi. Uning so‘zlariga ko‘ra, ozod qilinganlar orasida DXRdan to‘rt kishi va LXRdan ikki kishi bor.