Беларусь президенти Александр Лукашенко Коллектив хавфсизлик шартномаси ташкилоти (КХШТ) бузилмаслигини, мустаҳкамлигини маълум қилди, бироқ ташкилот келажаги бевосита Россиянинг Украинадаги махсус операцияси натижасига боғлиқ бўлиши мумкинлигини таъкидлади. Бу ҳақда «Интерфакс» хабар бермоқда.
Ереванда КХШТнинг Коллектив хавфсизлик кенгаши сессиясида нутқ сўзлар экан, у сўнгги вақтларда КХШТнинг ҳаёти ва тақдири Россиянинг Украинадаги махсус операциясига боғлиқ бўлиши ҳақида фикрлар пайдо бўлаётганини айтди: «Агар у ғалаба қозонса, КХШТ яшашда давом этади. Агар ютмаса, КХШТ мавжуд бўлмайди».
«Шуни ҳис қиляпманки, биз бу борада ягона фикрга келдик, яъни агар, худо кўрсатмасин, Россия қуласа, бизнинг жойимиз шу вайроналар остида бўлади», — деди Лукашенко.
«Бундай гаплар умуман бўлмаслиги керак. Биз ҳарбий-сиёсий майдондан кетмоқчи эмасмиз. КХШТ мавжуд бўлишда давом этади, ва ҳеч ким ҳеч қаерда қуламайди. Лекин бизга бирдамлик керак», — дея қўшиб қўйди Лукашенко.
КХШТ нима?
Коллектив хавфсизлик шартномаси ташкилоти — айни пайтда Арманистон, Беларусь, Қозоғистон, Қирғизистон, Россия ва Тожикистонни ўз ичига олган Евросиё ҳукуматлараро ҳарбий иттифоқи. Ташкилотни тузиш ҳақидаги шартнома 1992 йил 15 майда имзоланган.КХШТ мақсадлари тинчликни, халқаро ва минтақавий хавфсизлик ва барқарорликни мустаҳкамлаш, аъзо давлатлар мустақиллиги, ҳудудий яхлитлиги ва суверенитетини коллектив асосда ҳимоялашдан иборат.
Изоҳ (0)