Ukraina prezidenti Vladimir Zelenskiy Birlashgan Millatlar Tashkiloti Xavfsizlik kengashining shoshilinch chaqirilgan navbatdan tashqari yig‘ilishida Rossiyaning energetika terrorini to‘xtatishga chaqirdi va BMT ekspertlarini Ukrainaning muhim infratuzilma obyektlarini kelib tekshirishga taklif qildi. 23-noyabr kuni Ukraina elektr ta’minotida katta uzilishlar yuz berib, aholining aksariyati elektrsiz qolgan.
“Ukraina nomidan BMT ekspertlarini muhim infratuzilma obyektlariga tashrif buyurishga taklif qilaman. Ularning holatini baholash kerak”, — dedi Zelenskiy BMT Xavfsizlik Kengashi yig‘ilishidagi videoaloqa orqali so‘zlagan nutqida. Bundan tashqari, u Rossiyani BMT Xavfsizlik kengashida veto huquqidan mahrum etishni taklif qildi.
23-noyabr kuni Rossiya Kiyev va Ukrainaning qator viloyatlariga yangi raketa zarbalarini berdi. Ukraina Energetika vazirligi ma’lumotlariga ko‘ra, o‘qqa tutilishlar sabab barcha atom elektr stansiyalari hamda Ukrainaning aksariyat issiqlik elektr stansiyalari va gidroelektr stansiyalari o‘chirilgan. Ukraina prezidenti ofisi rahbari Andrey Yermak mamlakatda elektr ta’minotidagi uzilishlar bir necha hafta davom etishi mumkinligini aytdi. Uning so‘zlariga ko‘ra, shu sababli Ukraina generatorlarning strategik zaxirasiga muhtoj.
10 va 11-oktabr kunlari ham Ukraina hududiga ommaviy zarbalar berilgan edi. O‘shanda mamlakatning beshta viloyatida qisman blekaut yuz bergan.
Avvalroq Zelenskiy Ukrainaga yangi raketa hujumlari sodir bo‘lgan taqdirda foydalanish uchun 4 mingdan ortiq “buzilmas punktlar” tayyorlab qo‘yilganini aytgandi. Ular uyali aloqa, internet, elektr va issiqlik ta’minoti bilan jihozlanadi.
Izoh (0)