Polsha mudofaa vaziri Mariush Blashk Germaniyadan Varshavaga va’da qilingan Patriot havo mudofaa tizimlarini Ukrainaga topshirishni so‘radi. Bu haqda u o‘zining Twitter sahifasida ma’lum qildi.
Vazir tizimlarni Ukrainaning g‘arbiy chegarasiga joylashtirish mumkinligini aytdi. Blashakning fikricha, bu mamlakatni Rossiya zarbalari oqibatida yana elektr energiyasiz qolishidan himoya qiladi va Polsha sharqiy chegarasida ham xavfsizlikni kuchaytiradi.
15-noyabr kuni Polshaning Ukraina bilan chegara hududiga raketa qulaganidan keyin Germaniya Varshavaga mamlakat mudofaasini Patriot havo mudofaa tizimlarining qo‘shimcha qurilmalari bilan mustahkamlashni taklif qilgan. Voqea sodir bo‘lgan kuni Ukraina Rossiya tomondan keng ko‘lamli raketa hujumiga uchragandi. Buning oqibatida mamlakat energetika tizimi urush boshlanganidan beri eng katta zarbaga uchradi.
Dastlab raketalar Rossiyaga tegishli deb taxmin qilindi. Keyinchalik AP Amerika razvedkasi ma’lumotlariga tayanib, raketalar Rossiya raketalarini urib tushirish uchun Ukraina Qurolli kuchlari tomonidan otilgani haqida yozdi.
NATO bosh kotibi ham raketalarning Ukrainaga tegishli ekani ehtimoli yuqoriligini bildirdi. Ammo bunda Kiyev aybdor emasligi, Rossiya javobgar ekanini aytdi. Polsha prezidenti ham shunday fikrlarni ilgari surdi. Germaniya va Britaniya esa Polshaga raketa tushishiga “Putin urushi” sababchiligini ta’kidladi.
Izoh (0)