Туркия томонидан Сурия ва Ироққа зарбалар берилиши ушбу ҳудудларда фаолият олиб бораётган америкалик ходимлар хавфсизлигига таҳдид солади, деди АҚШ Мудофаа вазирлиги вакили генерал Пет Райдер ва зудлик билан вазиятни барқарорлаштиришга чақирди.
«Яқинда Сурияга берилган авиазарбалар у ерда ИШИДни енгиш учун маҳаллий шериклар билан иш олиб бораётган америкалик ходимлар хавфсизлигига бевосита таҳдид солди», — дейилади Райдернинг баёнотида.
Унинг сўзларига кўра, «келишилмаган жанговар ҳаракатлар Ироқ суверенитетига хавф солади».
Мансабдор қўшимча қилишича, «аввалгидек асосий эътиборни ИШИДни мағлуб қилишга қаратиш ва жойлардаги персоналнинг хавфсизлигини таъминлаш учун зудлик билан вазиятни барқарорлаштириш зарур».
«Биз Туркиянинг хавфсизлик соҳасидаги асосли хавотирларини тан оламиз. Туркия ва маҳаллий шерикларимиз билан ўт очишни тўхтатиш ҳақидаги келишувларни сақлаб қолишни муҳокама қилишда давом этамиз», — деди генерал. У Мудофаа вазирлиги «Сурия, Ироқ ва Туркия шимолида ҳаракатлар кучайганидан чуқур ташвишда» эканини таъкидлади.
Ироқ Курдистони ҳудудида ва Сурия шимолидаги Ҳалаб вилоятида 20 ноябрдан буён Туркия ҳарбий операцияси бўлиб ўтмоқда. Туркия ўзи террорчилик ташкилоти деб ҳисоблайдиган Курдистон ишчилар партияси позицияларига зарбалар бермоқда. Операция Истанбулнинг Бейўғли туманидаги Истиқлол кўчасида содир бўлиб, олти кишининг ўлимига олиб келган терактдан кейин бир ҳафта ўтиб бошланди. Туркия ҳукумати маълумотларига кўра, теракт Курдистон ишчилар партияси томонидан уюштирилган.
Аввалроқ АҚШ Эрон ҳукуматини Ироқ ҳудудий яхлитлигини бузишни тўхтатиб, Ироқ Курдистони ҳудудига зарбалар беришни бас қилишга чақирган эди.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)