Erdo‘g‘on Iroq va Suriya shimolidagi operatsiyani “faqat boshlanishi” deb atadi

Turkiya armiyasining Suriya shimoli va Iroqdagi harbiy amaliyoti “faqat boshlanishi”, Anqara chegaralarini himoyalashga qat’iy qaror qilgan, dedi prezident Rajab Toyyib Erdo‘g‘on hukmron partiya yig‘ilishida.

Uning ta’kidlashicha, Turkiya “o‘zi uchun qayg‘urishga” haqli.

“Suriya hududidan mamlakatimizga hech qanday tahdid bo‘lmaydi, deganlar o‘z va’dalarini bajara olmasligi ma’lum bo‘ldi. Biz Suriya chegaralari haqidagi so‘zimizga sodiq qoldik, ammo raqiblarimiz va’dasida turolmas ekan, o‘zimiz uchun qayg‘urishga haqlimiz”, — dedi Turkiya rahbari.

Erdo‘g‘on Turkiya armiyasi “qulay vaqt kelishi bilan yerdagi terrorchilar”ga hujum boshlashini ta’kidladi. Harbiylar Tel Rifat, Manbij va Ayn al-Arabdan boshlaydi va “ularni tozalaydi”.

Shu bilan birga, Turkiya rahbari Suriya prezidenti Bashar Asad bilan uchrashish imkoniyatini istisno qilmadi.

O‘z navbatida, Suriya tashqi ishlar vaziri o‘rinbosari Ayman Susan Turkiya o‘z zarbalari bilan mamlakat suvereniteti va xalqaro huquqni buzganini, bu esa vaziyatning yanada keskinlashishiga olib kelganini aytdi.

Avvalroq Turkiya Mudofaa vazirligi Suriya va Iroq shimolidagi kurd tuzilmalariga qarshi “Panja-qilich” havo operatsiyasi boshlangani haqida xabar bergandi. Vazirlik ma’lumotlariga ko‘ra, terrorchilar Turkiyaga hujum qilish uchun ushbu davlatlarning shimoliy hududlaridan baza sifatida foydalanmoqda.