Germaniyaning Bavariya yeridagi Manxing shahrida Kelt-Rim muzeyidan eng qimmatbaho eksponat — 483 ta tilla tangani o‘g‘irlab ketishdi, ularning narxi bir necha million yevroga baholanadi. Bu haqda voqea yuzasidan tekshiruv olib borayotgan Bavariya jinoyat ishlari idorasi vakili ma’lum qildi.
Politsiya ma’lumotlariga ko‘ra, gap XX asrda topilgan, keltlarga oid bo‘lgan eng katta oltin xazinasi haqida bormoqda. Umumiy og‘irligi 4 kg bo‘lgan tangalar 1999-yilda Rim imperiyasi davridagi kelt shahar-qal’asi — Manxing oppididagi qazish ishlari chog‘ida aniqlangan.
“Kelt xazinasini yo‘qotish — bu fojia, oltin tangalar tariximiz guvohlari sifatida bebahodir”, — dedi Bavariya ilm-fan va san’at vaziri Markus Blyume voqea yuzasidan.
Germaniya muzeylarida avval ham yirik o‘g‘irliklar bo‘lgan
Manxing oppididagi qazilmalar avval ham kriminal dunyo e’tiborini o‘ziga tortgan. Shu yil mayida noma’lum “qora arxeologlar” uning hududida 140 ta noqonuniy qazish ishlarini amalga oshirgan. Ekspertlar taxmin qilishicha, yovuz niyatlilar arxeologlarning dam olish kunidan foydalanib, tuproq zondlari yordamida kelt davriga oid obyektlarda qidiruv olib borgan. Ular nimadir topib, u yerdan olib ketgani noma’lum bo‘lib qolmoqda.2019-yilda Germaniyadagi eng mashhur muzeylardan biri — Drezdendagi “Yashil gumbaz” xazinasidan milliard yevrolik qadimiy san’at asarlari va qimmatbaho taqinchoqlar o‘marib ketilgan. 2022-yil yanvarida olti nafar ayblanuvchi ustidan sud o‘tkazilgan, biroq qimmatbaho buyumlarning qayerdaligi haqida hech qanday ma’lumot yo‘q.
2017-yil martida Berlindagi Bode muzeyidan 100 kilogramm og‘irlikdagi oltin tanga o‘g‘irlab ketilgan, uning qiymati 3,75 million yevroga baholanmoqda. Jinoyatchilar oxir-oqibat qo‘lga tushgan, ammo tanganing o‘zi topilgani yo‘q.
Izoh (0)