Britaniya birinchi marta Ukrainaga vertolyotlar yetkazib beradi

Buyuk Britaniya hukumati birinchi marta Ukrainaga vertolyotlar yetkazib berishga qaror qildi, shuningdek, ular 10 mingta artilleriya snaryadlari partiyasini yuboradi. Bu haqda Britaniya mudofaa vaziri Ben Uollesga tayanib, BBC xabar berdi.

Ta’kidlanishicha, gap uchta Sea King qidiruv-qutqaruv vertolyotlari haqida bormoqda, ularning birinchisi allaqachon Ukrainaga yetib kelgan. O‘tgan olti hafta davomida Ukraina ekipajlari Buyuk Britaniyada ushbu vertolyotlarda parvoz qilish va ularga xizmat ko‘rsatish bo‘yicha tayyorgarlikdan o‘tgan.

Sea King vertolyotlari Qirollik harbiy-havo kuchlari va Qirollik floti tomonidan foydalanilgan. Ularning oxirgisi 2018-yilda hisobdan chiqarilgan.

Avvalroq Buyuk Britaniya Ukrainaga yuqori aniqlikdagi Brimstone-2 raketalarini yuborgani, modernizatsiya qilingan raketalar lazerli mo‘ljalga olish tizimi va avvalgidan ikki marta uzoqroqqa otilishi bilan ajralib turishi xabar berilgan edi.

Buyuk Britaniya bosh vaziri Rishi Sunak o‘tgan hafta Ukrainaga kelgan edi. Tashrifi chog‘ida u Kiyevga havo hujumiga qarshi mudofaa vositalarini, shu jumladan, 125 ta zenit qurollarini yetkazishga va vayron bo‘lgan infratuzilmani qayta tiklashda ishtirok etishga va’da bergan edi. Britaniya tomonidan taqdim etilgan ko‘mak 2022-yilda allaqachon 3 milliard funt sterlingdan oshgan.