Ukrainaga yangi raketa hujumlari sodir bo‘lgan taqdirda foydalanish uchun 4 mingdan ortiq “buzilmas punktlar” — uyali aloqa, internet, elektr va issiqlik ta’minoti bilan jihozlangan nuqtalar tayyorlab qo‘yildi. Bu haqda Ukraina prezidenti Vladimir Zelenskiy o‘z videomurojaatida ma’lum qildi.
“Aholini qo‘llab-quvvatlash bo‘yicha yangi “Buzilmas punktlar” loyihamizni butun mamlakat bo‘ylab ham joriy qilmoqdamiz. Shu kunning natijasi o‘laroq, 4 mingdan ortiq ana shunday punkt tayyorlandi. Yana ko‘p ishlar rejalashtirilgan”, — dedi Zelenskiy.
Ukraina prezidenti shuningdek, bunday punktlarda “asosiy xizmatlar”ning barchasi — elektr, suv, issiqlik, birinchi tibbiy yordam qutisi, mobil aloqa va “kechayu-kunduz ishlovchi mutlaqo bepul” internet mavjud bo‘lishini ta’kidladi. Bu punktlar maktablar, shifoxonalar, viloyat va tuman hokimliklari qoshida ishlaydi. Zelenskiy ukrainaliklar “har qanday ssenariyga” tayyor turishi kerakligini qo‘shimcha qildi.
15-noyabr kuni Rossiya Mudofaa vazirligi Ukraina infratuzilmasiga yirik raketa hujumi uyushtirdi. Ukraina Energetika vazirligi rahbari German Galushenko buni urush boshlanganidan beri eng zarba deb atadi. Ukraina ichki ishlar vaziri Denis Monastirskiy esa 30 ga yaqin infratuzilma obyekti zarar ko‘rganini qo‘shimcha qildi.
18-noyabr kuni Zelenskiy 10 milliondan ortiq ukrainalik elektr energiyasiz qolganini ma’lum qildi. Uning aniqlik kiritishicha, eng qiyin vaziyat Kiyev va Vinnitsa, Odessa va Sumi viloyatlarida kuzatilmoqda.
Izoh (0)