Германиянинг Бавария еридаги Манхинг шаҳрида Кельт-Рим музейидан энг қимматбаҳо экспонат — 483 та тилла тангани ўғирлаб кетишди, уларнинг нархи бир неча миллион еврога баҳоланади. Бу ҳақда воқеа юзасидан текширув олиб бораётган Бавария жиноят ишлари идораси вакили маълум қилди.
Полиция маълумотларига кўра, гап ХХ асрда топилган, кельтларга оид бўлган энг катта олтин хазинаси ҳақида бормоқда. Умумий оғирлиги 4 кг бўлган тангалар 1999 йилда Рим империяси давридаги кельт шаҳар-қалъаси — Манхинг оппидидаги қазиш ишлари чоғида аниқланган.
«Кельт хазинасини йўқотиш — бу фожиа, олтин тангалар тарихимиз гувоҳлари сифатида бебаҳодир», — деди Бавария илм-фан ва санъат вазири Маркус Блюме воқеа юзасидан.
Германия музейларида аввал ҳам йирик ўғирликлар бўлган
Манхинг оппидидаги қазилмалар аввал ҳам криминал дунё эътиборини ўзига тортган. Шу йил майида номаълум «қора археологлар» унинг ҳудудида 140 та ноқонуний қазиш ишларини амалга оширган. Экспертлар тахмин қилишича, ёвуз ниятлилар археологларнинг дам олиш кунидан фойдаланиб, тупроқ зондлари ёрдамида кельт даврига оид объектларда қидирув олиб борган. Улар нимадир топиб, у ердан олиб кетгани номаълум бўлиб қолмоқда.2019 йилда Германиядаги энг машҳур музейлардан бири — Дрездендаги «Яшил гумбаз» хазинасидан миллиард евролик қадимий санъат асарлари ва қимматбаҳо тақинчоқлар ўмариб кетилган. 2022 йил январида олти нафар айбланувчи устидан суд ўтказилган, бироқ қимматбаҳо буюмларнинг қаердалиги ҳақида ҳеч қандай маълумот йўқ.
2017 йил мартида Берлиндаги Боде музейидан 100 килограмм оғирликдаги олтин танга ўғирлаб кетилган, унинг қиймати 3,75 миллион еврога баҳоланмоқда. Жиноятчилар охир-оқибат қўлга тушган, аммо танганинг ўзи топилгани йўқ.
Изоҳ (0)