Toshkent xalqaro aeroportida Misrdan uchib kelgan yo‘lovchi timsoh bolasi, 3 bosh iguana va 3 bosh ilonni noqonuniy olib kirishga uringandi. Toshkent hayvonot bog‘i ma’muriyatiga topshirilgan ushbu hayvonlar ahvoli haqida ma’lumot berildi.
Qayd etilishicha, aeroport xodimlarining yaxshi muvofiqlashtirilgan ishi ekzotik hayvonlarning hayotini saqlab qolishga yordam berdi.
“Kichkintoylarning ahvoli yomon edi, chunki ular issiq iqlimga moslashib, samolyotning yuk bo‘limidagi past harorat va tor sharoitda ancha vaqt qolib ketgan. Bundan tashqari, yangi tug‘ilgan iguanalardan ancha yirik bo‘lgan timsoh ular bilan bir qutida bo‘lib, ularni og‘ir jarohatlagan va ular hozirda o‘lim yoqasida...”, — deyiladi hayvonot bog‘i matbuot xizmati xabarida.
Xabarda aytilishicha, yangi tug‘ilgan yo‘lbars naqshli va to‘rli pitonlar juda ozg‘in bo‘lib, ularning tanasi suvsizlangan va jiddiy veterinar davolanishni talab qiladi. Ayni paytda ular karantinda va mutaxassislar nazorati ostida.
Avvalroq Davlat bojxona qo‘mitasi matbuot xizmati issiq iqlim sharoitlariga moslashgan jonivorlar samolyotning harorat past darajada bo‘ladigan yukxonasida va o‘ta zich joylashgan qutilar ichida keltirilgani sababli ahvoli qoniqarsiz deb baholanayotganini, ilonlar va iguanalardan ayrimlarining tanalari zamburug‘lar bilan kasallanganini ma’lum qilgandi.
Mavzuga doir:
Izoh (0)