Toshkent hayvonot bog‘i brakonyerlardan olib qo‘yilgan 57 ta Nil timsohining ahvoli bo‘yicha ma’lumot berdi (foto)

Toshkent xalqaro aeroportida timsoh bolalari noqonuniy olib o‘tilishiga chek qo‘yilgani va 57 bosh timsoh bolasi hayvonot bog‘iga topshirilgani xabar qilingandi. Toshkent hayvonot bog‘i ularning ahvoli bo‘yicha ma’lumot berdi.

Fuqarolar ularni noqonuniy tarzda O‘zbekistonga olib kirishga uringan vaqtda aeroport bojxona xizmati tomonidan olib qo‘yilgandi. 31-avgust kuni Toshkent hayvonot bog‘iga 57 ta Nil timsohi olib kelingan. Jonivorlar meva va sabzavotlar orasida folga qog‘ozga o‘ralgan plastik idishlarda tashilgan. Yangi tug‘ilgan jonivorlarni ushbu yo‘l bilan tashish ularning sog‘lig‘iga jiddiy zarar yetkazgan.

Shuning uchun kichik timsohlar qabul qilingan vaqtda ularning ba’zilari juda zaif holatda bo‘lgan. Hozirda ular xodimlar tomonidan himoyaga olingan maxsus joylarda saqlanmoqda. Zarur issiqlik, yorug‘lik hamda oziq-ovqat bilan ta’minlangan. Ular go‘sht bo‘laklari, baliq, yangi tug‘ilgan sichqonlar, mayda baliq va hasharotlar bilan boqilmoqda.

Timsohlar o‘sish va rivojlanish dinamikasini kuzatish va nazorat qilish maqsadida tarozida tortilib, o‘lchandi. Nil timsohlari Yer yuzidagi eng katta sudralib yuruvchilardan biri bo‘lib, ular ulkan hajmga ega (5–6 metr va undan yuqori). Ular barcha hayvonot bog‘larida ham saqlanmasligi mumkin, chunki ushbu timsohlar hayoti uchun keng suv ombori va malakali parvarish zarur.

Ma’lumot uchun, 30-avgust kuni Islom Karimov nomidagi Toshkent xalqaro aeroportida Qohira–Toshkent 401-sonli reys bilan uchib kelgan fuqaro M.S. tashqi ko‘rinishi Nil timsohi Crocodylus niloticus’ga o‘xshash timsoh bolalarini tegishli ruxsatnomalarsiz mamlakat hududiga olib kirishga uringani aniqlangan. Ularning soni 57 ta ekani ma’lum bo‘lgan.