Тошкент халқаро аэропортида Мисрдан учиб келган йўловчи тимсоҳ боласи, 3 бош игуана ва 3 бош илонни ноқонуний олиб киришга уринганди. Тошкент ҳайвонот боғи маъмуриятига топширилган ушбу ҳайвонлар аҳволи ҳақида маълумот берилди.
Қайд этилишича, аэропорт ходимларининг яхши мувофиқлаштирилган иши экзотик ҳайвонларнинг ҳаётини сақлаб қолишга ёрдам берди.
«Кичкинтойларнинг аҳволи ёмон эди, чунки улар иссиқ иқлимга мослашиб, самолётнинг юк бўлимидаги паст ҳарорат ва тор шароитда анча вақт қолиб кетган. Бундан ташқари, янги туғилган игуаналардан анча йирик бўлган тимсоҳ улар билан бир қутида бўлиб, уларни оғир жароҳатлаган ва улар ҳозирда ўлим ёқасида...», — дейилади ҳайвонот боғи матбуот хизмати хабарида.
Хабарда айтилишича, янги туғилган йўлбарс нақшли ва тўрли питонлар жуда озғин бўлиб, уларнинг танаси сувсизланган ва жиддий ветеринар даволанишни талаб қилади. Айни пайтда улар карантинда ва мутахассислар назорати остида.
Аввалроқ Давлат божхона қўмитаси матбуот хизмати иссиқ иқлим шароитларига мослашган жониворлар самолётнинг ҳарорат паст даражада бўладиган юкхонасида ва ўта зич жойлашган қутилар ичида келтирилгани сабабли аҳволи қониқарсиз деб баҳоланаётганини, илонлар ва игуаналардан айримларининг таналари замбуруғлар билан касалланганини маълум қилганди.
Мавзуга доир:
Изоҳ (0)