2030 йилга келиб, астронавтлар Ойда яшайдиган ва ишлайдиган бўлади. Бу ҳақда АҚШ Аэронавтика ва фазони тадқиқ қилиш миллий бошқармаси (NASA) вакили BBC телеканалига берган интервьюсида айтиб ўтди.
Америка агентлигининг Orion Ой фазо кемалари дастури раҳбари Говард Ху қайд этишича, «Артемида» миссияси доирасида Orion кемаси ортилган Space Launch System ракетасининг учирилиши инсоннинг коинотга парвозлари учун тарихий кунга айланган. Миссия муваффақиятли кечмоқда, барча тизимлар ишламоқда, жамоа эса Orion двигателларининг 21 ноябрь кунги кейинги парвозига тайёрланмоқда, унда фазо кемаси Ойнинг узоқ орбитасига чиқарилади.
«Албатта, мана шу ўн йилликда Ой юзасида яшайдиган одамлар бўлади. Уларнинг ўз яшаш жойлари, ойкезарлари бўлади, улар илм-фан билан машғул бўлади», — деди NASA вакили.
Айни пайтда Orion Ойдан тахминан 134 минг километр узоқликда бўлиб, кема бортида эса махсус манекен бор, у парвознинг одам организмига таъсирини қайд этиб боради.
«Бу биз олис коинот бўйича узоқ муддатга мўлжалланган тадқиқотлар йўлида қўйган биринчи қадамимиздир. Бу нафақат АҚШ, балки бутун дунё учун қилиняпти», — деди NASA вакили.
Шунингдек, Хунинг айтишича, NASA Orion кемаси ёрдамида одамларни Ойга тушириш имконини берувчи узоқ муддатли дастур ишлаб чиқмоқда. Унинг сўзларига кўра, агар «Артемида»нинг жорий парвози муваффақиятли кечса, унда кейинги парвоз экипаж иштирокида бўлади. Ундан кейин эса учинчи парвоз уюштирилиб, унинг доирасида астронавтлар бундан 50 йил аввал — 1972 йил декабрида «Аполлон-17» кемаси парвозидан кейин биринчи марта яна Ойга қўнади.
2022 йил 16 ноябрь куни Space Launch System элтувчи ракетасининг узоқ кутилган парвози амалга оширилди, бундан аввал у бир неча марта кечиктирилган эди. NASA учинчи уринишдагина коинотга бугунги кундаги энг бақувват ракетани юборишга муваффақ бўлди, унинг асосий вазифаси «Артемида» миссияси доирасида Orion космик кемасини орбитага чиқаришдан иборат эди. Парвоз муваффақиятли амалга оширилди, кема эса аллақачон Ойга қараб йўл олди.
Мавзуга доир: NASA Ой миссияси доирасида ўта оғир ракетани учирди. Парвоз аввал 3 марта кечиктирилган
Изоҳ (0)