Indoneziyada sodir bo‘lgan zilzila oqibatida kamida 44 kishi halok bo‘ldi, 300 ga yaqin odam jarohat oldi, deya xabar bermoqda Reuters mahalliy hukumatga tayanib.
“Mendagi mavjud bo‘lgan ma’lumotlarga ko‘ra, birgina shu kasalxonada 20 ga yaqin odam vafot etdi, kamida 300 kishi davolanmoqda”, — dedi rasmiylardan biri jurnalistlarga.
Antara agentligi ma’lumotlariga ko‘ra, 21-noyabr kuni tushdan keyin G‘arbiy Yava provinsiyasida 5,6 magnitudali zilzila sodir bo‘lgan. Indoneziya meteorologiya, iqlim va geofizika boshqarmasi xabariga ko‘ra, silkinish boshqa hududlarda, jumladan, Indoneziya poytaxti Jakartada ham sezilgan.
Zilzila epitsentri Chanjur shahridan 10 km janubi-g‘arbda yer ostida joylashgan. Bu hududda ko‘plab uylar vayron bo‘lgan, rasmiylar aholini yangi silkinishlar ehtimoli haqida ogohlantirgan, ammo zilzila sunamiga olib kelishi mumkinligini istisno qilgan.
Izoh (0)