8-noyabr kuni AQSH harbiy-dengiz floti Erondan Yamanga 70 tonnadan ziyod ammoniy perxloratini tashib ketayotgan baliqchi kemasini to‘xtatib qolgan edi. Ushbu modda raketa, raketa yonilg‘isi, shuningdek, portlovchi moddalar ishlab chiqarish uchun qo‘llaniladi, deb yozadi “Xronika Turkmenistana”.
Kemada 100 tonnadan ortiq karbamid o‘g‘iti (mochevina) ham topilgan. Mochevina — qishloq xo‘jaligida foydalaniladigan kimyoviy birikma bo‘lib, u portlovchi moddalar prekursori (tarkibiga qo‘shiladigan modda) sifatida qo‘llanilishi mumkin.
Turkmennews nashri e’lon qilingan fotosuratlarda karbamid o‘g‘itlar solingan qoplarga “Turkmanistonda ishlab chiqarilgan” degan yozuv tushirilganiga e’tibor qaratdi.
Kimyoviy modda ishlab chiqaruvchisi sifatida “Marikarbamid” zavodi ko‘rsatilgan.
Aniqlangan moddalar kattaligiga qarab, 12 tadan ortiq o‘rta masofali ballistik raketalar uchun yonilg‘i ishlab chiqarishga yetgan bo‘lardi, dedi AQSH Harbiy-dengiz kuchlari Markaziy qo‘mondonligi qo‘mondoni, vitse-admiral Bred Kuper.
AQSH HDK press-relizida qayd etilishicha, kema va uning to‘rt nafar yamanlik ekipaji a’zolari Erondan azaldan Yamandagi xusiylar uchun qurol yetkazib berishda foydalanilgan yo‘nalish bo‘ylab o‘tayotganida ushlab qolingan. Xusiylarga qurol-yarog‘larning bevosita yoki bilvosita yetkazilishi, sotilishi yoki berilishi BMT Xavfsizlik kengashi rezolyutsiyasiga va xalqaro huquqqa ziddir.
Oxir-oqibat, qo‘lga olingan kema cho‘ktirib yuborilgan, chunki AQSH harbiylari u tijoriy kemalar qatnovi uchun xavf tug‘diradi, degan xulosaga keldi.
Nashr qayd etishicha, Turkmanistonda Karbamid “Marikarbamid”, “Tejenkarbamid” va Garabogazkarbamid” zavodlarida ishlab chiqariladi. 2021-yil sentabrida prezident Gurbangulo Berdimuhamedovga ushbu korxonalar ichki bozor ehtiyojlarini qondirayotgani va o‘z mahsulotlarining asosiy qismini chet elga eksport qilayotgani haqida hisobot berilgandi.
Izoh (0)