Buyuk Britaniya bosh vaziri Rishi Sunak lavozimiga kirishganidan buyon birinchi marta Kiyevga tashrif buyurdi. U prezident Vladimir Zelenskiy bilan suhbati chog‘ida urushni tugatish uchun Ukraina havo mudofaasi kuchaytirilishini tasdiqladi.
Xabar qilinishicha, bosh vazir Ukraina prezidenti bilan uchrashib, urush bo‘yicha so‘nggi voqealarni muhokama qildi. Bayonotga ko‘ra, Sunak Buyuk Britaniya bu davlatni qo‘llab-quvvatlashda davom etishiga va’da berdi. 50 million funt sterlinglik havo hujumidan mudofaa uchun asosiy paket “Ukraina tinch aholisini va muhim milliy infratuzilmani Rossiyaning kuchli zarbalaridan himoya qilishga” qaratilgani ta’kidlab o‘tildi.
“Birlashgan Qirollikning boshidanoq Ukrainaga qilgan munosabatidan faxrlanaman va bugun men Buyuk Britaniya va ittifoqchilarimiz Ukraina bilan birga bo‘lishda davom etishini aytish uchun keldim. Ukraina qurolli kuchlari yerdagi rus qo‘shinlarini ortga qaytarishga muvaffaq bo‘lsa-da, tinch aholi havodan shafqatsizlarcha bombardimon qilinmoqda”, — dedi bosh vazir.
Sky News’ning yozishicha, oxirgi haftada Rossiya Ukrainaning muhim infratuzilmalariga 148 dan ortiq raketa zarbasini berib, 10 millionga yaqin aholini elektrsiz qoldirgan.
Izoh (0)