Tojikiston prezidentining nevarasi mamlakat Dzyudo federatsiyasi rahbari etib saylandi

19-noyabr kuni Dushanbeda Tojikiston Dzyudo federatsiyasining hisobot-saylov majlisi bo‘lib o‘tdi. Kun tartibidagi masalalardan biri ushbu sport tashkilotining yangi rahbariyatini saylashdan iborat bo‘ldi, deb yozadi Asia Plus.

Majlis ishtirokchilari federatsiya rahbarligiga eng munosib nomzod sifatida Ismoil Mahmadzoirni ilgari surdi.

Ismoil Mahmadzoir 1996-yilda tug‘ilgan, u Tojikiston prezidenti Emomali Rahmonning to‘ng‘ich nevarasi. U yoshligidan sport bilan shug‘ullanadi, sevimli sport turlari orasida dzyudo, futbol, ot sporti va boshqalar bor.

Ismoil Mahmadzoir prezidentning katta qizi Firuza Rahmonova va Mahmadzoir Soibovning o‘g‘lidir.

So‘nggi yillarda “Hoji Sharif” sport klubiga homiylik qilmoqda. Unda yuzlab istiqbolli sportchilar shug‘ullandi. Klub 2019-yil sentabrida ochilgan.

Klubni yaratishdan maqsad xalqaro maydonda Tojikistonga munosib vakillik qila oladigan professional sportchilarni tayyorlashdan iborat bo‘lgan.

Ushbu klubning eng yaxshi sportchilaridan biri Somon Mahmadbekov yoshlar orasida dzyudo bo‘yicha jahon chempioniga aylandi.

“Hoji Sharif” klubining barcha sportchilari xalqaro darajada hammasi bo‘lib 171 ta medalni qo‘lga kiritgan (47 ta oltin, 30 ta kumush va 94 ta bronza).

Tojikiston rahbari Emomali Rahmonning o‘zi mamlakat Milliy olimpiya qo‘mitasi prezidenti hisoblanadi. 2021-yil dekabrida u to‘rtinchi marta bu lavozimga saylangandi.

2019-yilda esa Emomali Rahmonning kichik o‘g‘li, 21 yoshli Somon Emomali mamlakatning “Talko Kabel” alyuminiy kompaniyasi bosh direktorining o‘rinbosari lavozimiga tayinlangani xabar berilgandi.

Emomali Rahmon to‘qqiz farzandning otasi, uning yettita qizi, ikkita o‘g‘li bor. Tojikiston prezidentining bolalari mamlakatda yuqori lavozimlarda ishlaydi. Ikkinchi qizi Ozoda Rahmon prezident devonini boshqaradi, katta o‘g‘li Rustam Emomali Dushanbe shahrining meri. To‘rtinchi qizi Ruhshona Rahmonova Tashqi ishlar vazirligida bo‘lim boshlig‘i, oltinchi qizi Zarina Rahmon Tojikistonning eng yirik banklaridan bo‘lgan “Oriyonbank” raisining o‘rinbosari lavozimida faoliyat olib boradi.