Twitter’ning yangi xo‘jayini Ilon Mask ijtimoiy tarmoq foydalanuvchilariga AQSH sobiq prezidenti Donald Trampning akkauntini qaytarish yoki qaytarmaslik haqidagi qarorni qabul qilishni taklif etdi.
Reinstate former President Trump
— Elon Musk (@elonmusk) November 19, 2022
Tegishli so‘rovnomani Mask o‘z akkauntiga joyladi.
Ayni paytgacha ushbu so‘rovda qariyb 7,3 million kishi qatnashib, ularning 53,3 foizi Trampning Twitter’ga qaytishini qo‘llab-quvvatlagan.
So‘rov bir kecha-kunduz davom etadi, Twitter foydalanuvchilari 20-noyabr Toshkent vaqti bilan taxminan tonggi uch yarimlargacha ovoz berishi mumkin.
Trampning Twitter’dagi akkaunti 2021-yil yanvarida, prezident tarafdorlari Kongress binosiga shiddatli hujum uyushtirganidan keyin bir umrga bloklab qo‘yilgandi. Ijtimoiy tarmoq ma’muriyati versiyasiga ko‘ra, Tramp o‘z postlarida hujumchilarga erk bergan. Shuningdek, prezidentning Facebook va Instagram’dagi akkauntlari ham bloklangan.
Mask 2022-yil mayida, uning Twitter bilan oldi-sotdi bitimi hali yakunlanmagan paytda, Trampning akkauntini qaytarishga tayyorligini aytgandi. “Bu xato deb o‘ylayman, chunki bu mamlakatning katta qismini qochirib yubordi va oxir-oqibat Donald Trampning fikr bildirish huquqidan mahrum bo‘lishiga olib keldi”, — degan edi u sobiq prezidentning ijtimoiy tarmoqda bloklanishi haqida.
Trampning o‘zi esa 2022-yil aprelida baribir Twitter’ga qaytmoqchi emasligini aytgandi.
Izoh (0)