Буюк Британия бош вазири Риши Сунак лавозимига киришганидан буён биринчи марта Киевга ташриф буюрди. У президент Владимир Зеленский билан суҳбати чоғида урушни тугатиш учун Украина ҳаво мудофааси кучайтирилишини тасдиқлади.
Хабар қилинишича, бош вазир Украина президенти билан учрашиб, уруш бўйича сўнгги воқеаларни муҳокама қилди. Баёнотга кўра, Сунак Буюк Британия бу давлатни қўллаб-қувватлашда давом этишига ваъда берди. 50 миллион фунт стерлинглик ҳаво ҳужумидан мудофаа учун асосий пакет «Украина тинч аҳолисини ва муҳим миллий инфратузилмани Россиянинг кучли зарбаларидан ҳимоя қилишга» қаратилгани таъкидлаб ўтилди.
«Бирлашган Қиролликнинг бошиданоқ Украинага қилган муносабатидан фахрланаман ва бугун мен Буюк Британия ва иттифоқчиларимиз Украина билан бирга бўлишда давом этишини айтиш учун келдим. Украина қуролли кучлари ердаги рус қўшинларини ортга қайтаришга муваффақ бўлса-да, тинч аҳоли ҳаводан шафқатсизларча бомбардимон қилинмоқда», — деди бош вазир.
Sky News’нинг ёзишича, охирги ҳафтада Россия Украинанинг муҳим инфратузилмаларига 148 дан ортиқ ракета зарбасини бериб, 10 миллионга яқин аҳолини электрсиз қолдирган.
Изоҳ (0)