Tashqi ishlar vaziri Vladimir Norov 17-noyabr kuni Samarqanddagi Yevropa Ittifoqi – Markaziy Osiyo vazirlar uchrashuvidagi nutqida Afg‘oniston masalasiga to‘xtalib o‘tdi, deb xabar bermoqda “Daryo” muxbiri.
Vladimir Norovga ko‘ra, O‘zbekiston Afg‘onistonning yakkalanib qolishi va uning e’tibordan chetdan qolishiga yo‘l qo‘ymaslik, shuningdek, mavjud og‘ir gumanitar vaziyatni hal qilish bo‘yicha choralarni ko‘radi.
O‘zbekiston qo‘shni davlatga tizimli yordam berib kelmoqda. Mamlakatimiz Afg‘onistonga bir necha bor gumanitar yordam yubordi. O‘zbekiston Respublikasi prezidenti Shavkat Mirziyoyev Termiz shahrida Afg‘onistonni gumanitar qo‘llab-quvvatlash jamg‘armasini tashkil etish tashabbusi bilan chiqdi. Shu o‘rinda eslatib o‘tish joizki, Termiz shahrida zamonaviy infratuzilmaga ega xalqaro transport-logistika xabi tashkil etilgan.Ta’kidlanishicha, Termiz—Mozori-Sharif—Kobul—Peshovar temiryo‘lini qurish kabi yirik loyihalar orqali Afg‘oniston Markaziy va janubiy Osiyo o‘rtasidagi aloqaga aylanishi mumkin.O‘zbekiston “Tolibon” tomonidan jahon hamjamiyatining asosiy talablarini bajarishi tarafdori bo‘lib qolmoqda. Bu talablar keng vakillik asosida hukumat tuzish, xotin-qizlar va milliy ozchiliklar huquqlariga rioya qilish, terrorchilik guruhlari bilan aloqalarni uzishni qamrab olgan, — dedi tashqi ishlar vaziri.
Shuningdek, uchrashuvda Yevropa Ittifoqi va Markaziy Osiyo davlatlari tashqi siyosat idoralari vakillari tomonidan siyosiy-diplomatik, savdo-iqtisodiy, investitsiya, suv-energetika, ekologik va madaniy sohalarda ikki mintaqa o‘rtasidagi o‘zaro munosabatlarning bugungi holati va rivojlanish istiqbollari muhokama qilindi.
Izoh (0)