Ташқи ишлар вазири Владимир Норов 17 ноябрь куни Самарқанддаги Европа Иттифоқи – Марказий Осиё вазирлар учрашувидаги нутқида Афғонистон масаласига тўхталиб ўтди, деб хабар бермоқда «Дарё» мухбири.
Владимир Норовга кўра, Ўзбекистон Афғонистоннинг яккаланиб қолиши ва унинг эътибордан четдан қолишига йўл қўймаслик, шунингдек, мавжуд оғир гуманитар вазиятни ҳал қилиш бўйича чораларни кўради.
Ўзбекистон қўшни давлатга тизимли ёрдам бериб келмоқда. Мамлакатимиз Афғонистонга бир неча бор гуманитар ёрдам юборди. Ўзбекистон Республикаси президенти Шавкат Мирзиёев Термиз шаҳрида Афғонистонни гуманитар қўллаб-қувватлаш жамғармасини ташкил этиш ташаббуси билан чиқди. Шу ўринда эслатиб ўтиш жоизки, Термиз шаҳрида замонавий инфратузилмага эга халқаро транспорт-логистика хаби ташкил этилган.Таъкидланишича, Термиз—Мозори-Шариф—Кобул—Пешовар темир йўлини қуриш каби йирик лойиҳалар орқали Афғонистон Марказий ва жанубий Осиё ўртасидаги алоқага айланиши мумкин.Ўзбекистон «Толибон» томонидан жаҳон ҳамжамиятининг асосий талабларини бажариши тарафдори бўлиб қолмоқда. Бу талаблар кенг вакиллик асосида ҳукумат тузиш, хотин-қизлар ва миллий озчиликлар ҳуқуқларига риоя қилиш, террорчилик гуруҳлари билан алоқаларни узишни қамраб олган, — деди ташқи ишлар вазири.
Шунингдек, учрашувда Европа Иттифоқи ва Марказий Осиё давлатлари ташқи сиёсат идоралари вакиллари томонидан сиёсий-дипломатик, савдо-иқтисодий, инвестиция, сув-энергетика, экологик ва маданий соҳаларда икки минтақа ўртасидаги ўзаро муносабатларнинг бугунги ҳолати ва ривожланиш истиқболлари муҳокама қилинди.
Изоҳ (0)