O‘zbekiston elchixonasida Polshaning Adamed Group kompaniyasi direktori Katarina Dubno bilan uchrashuv bo‘lib o‘tdi, deb xabar bermoqda “Dunyo” axborot agentligi.
Qayd etilishicha, uchrashuvda o‘zaro hamkorlikni rivojlantirish va kompaniyaning O‘zbekiston farmatsevtika bozoriga faol kirishi bilan bog‘liq masalalar atroflicha muhokama qilingan.
1986-yilda tashkil etilgan Adamed Group Polshadagi ikkinchi yirik farmatsevtika va biotexnologiya kompaniyasi hisoblanadi. U Ispaniya, Rossiya, Chexiya, Vyetnam, Italiya, Qozog‘iston, O‘zbekiston, Slovakiya va Ukrainada o‘z vakolatxonalariga ega.
Joriy yil oktabr oyida Toshkent shahrida ham ushbu kompaniyaning to‘laqonli vakolatxonasi ochilgan. Hozirgi paytda unda 30 nafar xodim ishga qabul qilinmoqda. Ofis faoliyati mutaxassislar tayyorlash, O‘zbekistondagi tibbiyot muassasalarini maxsus jihozlar bilan ta’minlash, farmatsevtika sanoatida texnologik innovatsiyalarni qo‘llash, farmatsevtika va tibbiy xizmatlar integratsiyasini rag‘batlantirish, shuningdek, Polshada mutaxassislar tayyorlash uchun grantlar ajratish bilan bog‘liq loyihalarni ilgari surishga yo‘naltiriladi.
Adamed Group, shuningdek, O‘zbekistonda farmatsevtika mahsulotlari savdosini oshirishni rejalashtirmoqda. Shuningdek, o‘zbek bozori tahlili asosida O‘zbekistonda dori vositalari ishlab chiqaruvchi korxonalarni ochish masalasi ham kun tartibida turibdi.
Uchrashuv chog‘ida O‘zbekiston elchisi Bahrom Boboyev Toshkent tibbiyot akademiyasi (TTA) bilan avval erishilgan kelishuvlarni amalga oshirish borasidagi muvaffaqiyatlarni ta’kidlagan. Xususan, Adamed Group kompaniyasi TMA negizida talabalar uchun dori vositalari ishlab chiqarish, biotexnologiya va farmatsevtika sohasida innovatsiya tadqiqotlari, nou-xauni joriy etish bo‘yicha simulyatsiya o‘quv laboratoriyasini qurishga kirishgan. Bundan tashqari, 2022-yilda TTAning eng yaxshi talabalari uchun 440 ming dollar miqdorida 8 ta grant ajratilgan.
O‘z navbatida, Katarina Dubno O‘zbekistonda sog‘liqni saqlashning asosiy vazifalaridan biri bo‘lajak tibbiyot mutaxassislarini tayyorlash ekanini qayd etgan. Polsha kompaniyasi bu jarayonda ko‘mak berish niyatida ekanini tasdiqlagan.
Yaqin kelajakda kompaniya O‘zbekistondagi tibbiyot oliy o‘quv yurtlarida tahsil olayotgan yoshlar uchun (eksperimental sinflar) “Adamed SmartUp Academy” pilot dasturini amalga oshirish, innovatsion yechimlarni topish yoki bozorda mavjud dori vositalarini takomillashtirish bo‘yicha tajriba almashishni yo‘lga qo‘yish, Toshkent shahridagi Respublika ixtisoslashtirilgan kardiologiya ilmiy-amaliy tibbiyot markazi bilan hamkorlikni rivojlantirish, yurak-o‘pka reanimatsiyasi uchun o‘quv fantomlari majmuasini taqdim etishni mo‘ljallamoqda.
Ushbu loyihalarni atroflicha muhokama qilish maqsadida Adamed Group vakillari 21—24-noyabr kunlari amaliy safar bilan O‘zbekistonga kelishi rejalashtirmoqda.
Izoh (0)