Suriya shimoli-sharqidagi Amerika qo‘shinlari joylashgan Green Village harbiy bazasi raketa bilan o‘qqa tutildi, deb yozadi “RBK” Qurolli kuchlar markaziy qo‘mondonligiga tayanib.
Hodisa 17-noyabr kuni kechqurun yuz bergan. Qo‘mondonlik ma’lumotlariga ko‘ra, hech kim jabrlanmagan, bazaga ham zarar yetmagan.
Harbiylar hodisa yuz bergan vaziyatni tekshirmoqda. Hujum kim tomonidan amalga oshirilgani hozircha noma’lum.
Baza bundan avval 18-sentabr kuni o‘qqa tutilgandi. Unga qarata uchta raketa otilgan. Shuningdek, 17-avgust kuni ham yana bir hujum sodir etilgan, o‘sha paytda bazada koalitsiya kuchlari vakillari bo‘lgan.
25-avgust kuni Markaziy qo‘mondonlik ma’lumotlariga ko‘ra, Green Village va Conoco bazalari “Eron tomonidan qo‘llab-quvvatlanuvchi jangarilar” tomonidan hujumga uchragan, uch nafar amerikalik harbiy jabrlangan. AQSH zarbdor vertolyotlari javob o‘ti ochib, kamida uchta avtomobilni va “raketalar otilishi uchun javobgar bo‘lgan” bir necha kishini yo‘q qilgan.
Green Village bazasi Dayr-az-Zor viloyatida, neft koni yaqinida joylashgan. CNN yozishicha, Suriyada qariyb 900 nafar amerikalik harbiylar bo‘lib, ular At-Tanf bazasiga va sharqiy konlarga joylashtirilgan.
Izoh (0)