Сурия шимоли-шарқидаги Америка қўшинлари жойлашган Green Village ҳарбий базаси ракета билан ўққа тутилди, деб ёзади «РБК» Қуролли кучлар марказий қўмондонлигига таяниб.
Ҳодиса 17 ноябрь куни кечқурун юз берган. Қўмондонлик маълумотларига кўра, ҳеч ким жабрланмаган, базага ҳам зарар етмаган.
Ҳарбийлар ҳодиса юз берган вазиятни текширмоқда. Ҳужум ким томонидан амалга оширилгани ҳозирча номаълум.
База бундан аввал 18 сентябрь куни ўққа тутилганди. Унга қарата учта ракета отилган. Шунингдек, 17 август куни ҳам яна бир ҳужум содир этилган, ўша пайтда базада коалиция кучлари вакиллари бўлган.
25 август куни Марказий қўмондонлик маълумотларига кўра, Green Village ва Conoco базалари «Эрон томонидан қўллаб-қувватланувчи жангарилар» томонидан ҳужумга учраган, уч нафар америкалик ҳарбий жабрланган. АҚШ зарбдор вертолётлари жавоб ўти очиб, камида учта автомобилни ва «ракеталар отилиши учун жавобгар бўлган» бир неча кишини йўқ қилган.
Green Village базаси Дайр-аз-Зор вилоятида, нефть кони яқинида жойлашган. CNN ёзишича, Сурияда қарийб 900 нафар америкалик ҳарбийлар бўлиб, улар Ат-Танф базасига ва шарқий конларга жойлаштирилган.
Изоҳ (0)