Isroil Amerika Qo‘shma Shtatlar (AQSH) bosimi ostida Ukrainaga qurol yetkazib berishni moliyalashtirishga rozi bo‘ldi. Bu haqda Haaretz xabar berdi.
Nashrning G‘arbdagi manbalariga ko‘ra, Isroil sof gumanitar yordamdan qurol yetkazib berishga o‘tishga rozi bo‘lgan. Bunga AQSh prezidenti Jo Bayden ma’muriyati bosimi sabab bo‘lgan. Shu tariqa, Isroil Ukraina uchun “strategik uskunalar” sotib olishni moliyalashtirgan.
Isroil Ukrainaga nima yetkazib berdi?
Isroilda yoki u bilan hamkorlikda ishlab chiqilgan qurollarni NATO davlatlari orqali yetkazib berishga ruxsat berilgan. Ukraina Qurolli Kuchlari shu tariqa arseanlini kengaytirishi va boshqa “strategik uskunalar”dan foydalanishi mumkin. Bu qanday “uskunalar” ekani haqida xabar berilmagan, biroq Isroil bunga o‘z milliy byudjetidan ko‘p million dollar sarflagani ma’lum.
Shu bilan birga, bu avvalgi hukumat tomonidan moliyalashtirilgan bir martalik aksiya bo‘lgan. Keyingi moliyalashtirish ishlari esa Isroil bosh vaziri Netanyaxuga bog‘liq. Zelenskiyning aytishicha, Isroil rahbari qurol-yarog‘ yetkazib berish masalasini ko‘rib chiqishga va’da bergan.
Mudofaa sohasidagi manbalarga ko‘ra, Isroil hukumati hozirda mahalliy korxonalarga Eronga qarshi turish uchun tezroq va yashirin uchuvchisiz uchish qurilmalarini ishlab chiqish vazifasini topshirgan. Dron ishlab chiquvchilar uchish qurilmasining xizmat qilish muddatini oshirish va ularning radarlarda “ko‘rinmas”ligini ta’minlash ustida ishlamoqda.
Isroil ko‘p yillar davomida o‘zi ishlab chiqargan dronlari borligini yashirib kelgan va 2022-yilning yozidagina hukumat ushbu mavzuni ommaviy axborot vositalarida yoritishga qo‘yilgan taqiqini bekor qilgan. Ko‘plab manbalarga ko‘ra, hukumat sanoat kompaniyalarining tashqi bozorga chiqish uchun shunday qadam tashlagan.
Hozirgi vaqtda Isroilning eng mashhur jangovar uchuvchisiz uchoqlari qatoriga Elbit tizimlari tomonidan ishlab chiqarilgan Hermes-450 va Israel Aerospace Industries (IAI) kompaniyasining Heron-TP droni kiradi.
Izoh (0)