Shimoliy Koreya Koreya yarim orolidan sharqqa qarata katta masofali ballistik raketa uchirdi. Bu haqda Yonhap agentligi Shtab boshliqlari birlashgan qo‘mitasiga tayanib xabar bermoqda.
Harbiylar taxmin qilishicha, gap qit’alararo ballistik raketa haqida borayotgan bo‘lishi mumkin. Ayni paytda mutaxassislar uning parvozi parametrlarini tahlil qilmoqda: raketa turini aniqlash uchun parvoz masofasi, balandligi va tezligi o‘lchanishi kerak.
KXDR raketa uchirgani haqida Yaponiya Mudofaa vazirligi ham xabar berdi. Harbiylar parvoz haqida mahalliy vaqt bilan taxminan 10:14 da (Toshkent vaqti bilan 6:14) xabar bergan. Idora ham uning qit’alararo raketa bo‘lganini taxmin qilmoqda. Vazirlik ma’lumotlariga ko‘ra, snaryad Koreya yarim orolining g‘arbiy sohillaridan uchirilgan va Yaponiya iqtisodiy zonasiga — Xokkaydo orolidan g‘arbga, dengizga kelib tushgan.
“Yana bir marta qat’iyan ta’kidlayman: bu mutlaqo nomaqbul”, — deya hodisaga izoh berdi Yaponiya bosh vaziri Fumio Kisida.
Bu yil boshidan buyon KXDR tomonidan 34-marta raketa uchirilishidir.
Shimoliy Koreya ketma-ket ikki kundan buyon ballistik raketalar uchirmoqda. Bir kun avval ham KXDR harbiylari Yapon dengiziga qarata snaryad otgandi. Shu kuniyoq Janubiy Koreya va AQSH Mudofaa vazirliklari raketaga qarshi mudofaa bo‘yicha maslahatlashuvlar o‘tkazdi. Keyinroq uning qisqa masofali raketa bo‘lgani, u 240 km masofani bosib o‘tib, 45 km balandlikka uchgani ma’lum bo‘ldi.
KXDR Tashqi ishlar vaziri Chve Son Xi avvalroq agar AQSH o‘z ittifoqchilarining Shimoliy Koreyaga nisbatan tiyib turish qobiliyatlarini kuchaytirishda davom etadigan bo‘lsa, Pxenyan “yanada shafqatsizroq” harbiy harakatlarni qo‘llashi haqida ogohlantirgandi. U AQSH, Janubiy Koreya va Yaponiya rahbarlari Kambodjadagi Sharqiy Osiyo sammitida uch tomonlama uchrashuv o‘tkazib, qarshi turish choralarini muhokama qilganiga e’tibor qaratdi.
AQSH va Janubiy Koreya prezidentlari Jo Bayden va Yun Sok Yol hamda Yaponiya bosh vaziri Fumio Kisida sammitda 13-noyabr kuni uchrashib, Shimoliy Koreyaning raketa parvozlariga birgalikda javob qilishga kelishib olgandi.
Izoh (0)