“Rulda men bo‘lmasam-da, shunday ko‘rsatishga urinishmoqda”. Qashqadaryolik avtobloger o‘zi bilan bog‘liq voqea haqida

Qashqadaryo viloyatining Yakkabog‘ tumanida faoliyat yurituvchi avtobloger Maqsud Muzaffarov tanish do‘sti bilan uning avtomobilida YTH sodir bo‘lganini, biroq rul boshqaruvida u bo‘lmasa-da, IIB xodimlari uni aybdor qilishga urinishayotganini aytmoqda. Bu haqda bloger “Daryo” jurnalisti bilan muloqotida gapirib berdi.

Kecha, 17-noyabr kuni biz bilan bog‘liq noxush holat ro‘y berdi. Mening mashinamni boshqarib ketayotgan do‘stim qorong‘ida oldidan chiqib qolgan odamni urib yubordi. Yo‘lovchining mast bo‘lgani va piyodalar o‘tishi mumkin bo‘lmagan joydan yo‘lni kesib o‘tgani do‘stimni shoshirib qo‘ydi. Yo‘lovchining mastligini shifokorlar ham tasdiqladi. Voqea sodir bo‘lgandan so‘ng tezda yo‘lovchiga birinchi yordamni ko‘rsatib, uni shifoxonaga olib bordik. Bemorning ahvoli yaxshi, — deydi bloger Maqsud Muzaffarov.

Avtobloger avtomobilining ust qismi zararlanmagani, faqatgina old oynasi singani bemorga unchalik ham qattiq zarar yetmaganidan dalolat berishini aytmoqda.

To‘g‘ri, YTH har qanday holatda ham YTH. Biroq ko‘rib turganingizdek, mashinaning old kapoti zararlanmagan, faqat old oyna singan. Bu yo‘lovchiga yengil jarohat yetganini anglatadi. Qolaversa, biz yo‘lovchiga tezda yordam ko‘rsatdik. Shunday bo‘lsa-da, Yakkabog‘ tuman IIB tergovchilari tarixda bo‘lmagan tekshiruvlarni amalga oshirib, meni rulda edi deb ko‘rsatishga urinmoqda, — deydi avtobloger.

Qo‘shimcha qilinishicha, IIB tergovchisi Maqsud Muzaffarov va uning do‘sti ustidagi barcha kiyimlarini yechib olgan va tekshirmoqchiligini, shuningdek avtomobil o‘rindiqlaridagi qoplamalarni ham olib, Toshkentdagi ekspertizaga jo‘natmoqchiligini bildirgan.

Men shu paytgacha YTHlar sodir bo‘lganini, undan so‘ng tekshiruvlar bo‘lganini ko‘rganman, ammo avtomobil ichidagi odamlar kiyimini yechib olishganini, avtomobil o‘rnidig‘idagi qoplamalarni Toshkentga yuborib, ekspertizadan o‘tkazishlari kerakligini birinchi marotaba eshitib turibman. Bu harakatlarning tag zamirida men rul boshqaruvida bo‘lmasam-da, meni rulda edi deb ko‘rsatish va shu orqali menga bosim o‘tkazishga urinish deb hisoblayman, — deydi Maqsud Muzaffarov “Daryo” bilan suhbatida.

Mazkur voqea yuzasidan Ichki ishlar vazirligi axborot xizmati rahbari Shohruh G‘iyosov ham rasmiy ma’lumot berdi.

Joriy yilning 17-noyabr kuni soat 18:40 larda, Qashqadaryo viloyati Yakkabog‘ tumani “Ayg‘irko‘l” mahallasi hududidan o‘tuvchi 4K-347a avtomobil yo‘lida harakatlanib ketayotgan fuqaro Sh.M. boshqaruvidagi Lacetti rusumli davlat raqami  70U102UA transport vositasi piyodalar o‘tishi uchun belgilanmagan joydan yo‘lning qatnov qismini kesib o‘tayotgan fuqaro O.L.ni urib yuborib YTH sodir etgan. Jabrlanuvchi O.L. “Bosh miya chayqalishi, boldir suyagining yopiq sinib siljishi” tashxisi bilan tuman kasalxonasiga yotqizilgan. Hozirda holat yuzasidan Yakkabog‘ tuman IIB Tergov bo‘limi tomonidan tergovga qadar tekshiruv ishlari olib borilmoqda, — deyiladi rasmiy axborotda.

Shohruh G‘iyosov, shuningdek, jamoatchilikdan mazkur YTHni bloger Maqsud Muzaffarov bilan bog‘lash hamda ijtimoiy tarmoqlarda asossiz xabarlarni tarqatish noo‘rin ekanini ta’kidlagan.

Eslatib o‘tamiz, Maqsud Muzaffarov jamoatchilikka YPX xodimining savodsizligini isbotlab berishi, Qamashida YPX inspektorini qoidabuzarligi uchun jarima to‘lashga majbur qilgani va Qashqadaryo yo‘llaridagi qoidabuzarliklarni nazorat qilishga kelgan samarqandlik YPX xodimining o‘zi qoida buzganini isbotlab, uning ham jarimaga tortilishida tashabbus ko‘rsatgani bilan jamoatchilikka yaxshi tanilgan.