Davlat xarajatlari daromadlardan ko‘p – Senatda budjet masalasi muhokama qilindi

Senat yalpi majlisida davlat budjetining 2022-yil 9 oyi yakuni bo‘yicha ijrosi muhokama qilindi. Bu haqda “Daryo” muxbiri xabar bermoqda.

Majlisda bugungi kunda jahon iqtisodiyotida kechayotgan murakkab jarayonlarga qaramasdan 2022-yilning 9 oyida O‘zbekiston iqtisodiyotida barqaror o‘sish sur’atlari saqlab qolingani ta’kidlandi.

Respublikada yalpi ichki mahsulot hajmi 2022-yilning yanvar—sentabr oylarida o‘tgan yilning mos davriga nisbatan 5,8 foizga o‘sib, 627 trillion 477 milliard so‘mni tashkil etdi.

Iqtisodiy o‘sishning asosiy drayverlari xizmatlar va qurilish sohalari bo‘lib, bu sohalar mos ravishda 7,9 va 6,3 foizga o‘sdi. Sanoat 5,9 foiz, qishloq xo‘jaligi 3,6 foizga o‘sdi. Tashqi savdo aylanmasi hajmi qariyb 36 milliard dollarni tashkil etib, o‘tgan yilning 9 oylik ko‘rsatkichiga nisbatan 27 foizga ortdi. Shundan, eksport hajmi 2021-yilning mos davriga nisbatan 36 foizga oshib, 14 milliard dollarni, import hajmi 22 foizga ko‘payib, 22 milliard dollarni tashkil etdi. Hisobot davrida inflyatsiya darajasi yil boshiga nisbatan 8,1 foizni tashkil etdi”, – dedi moliya vaziri Timur Ishmetov.

Majlisda ma’lum qilinishicha, hisobot davrida davlat budjeti daromadlari davlat maqsadli jamg‘armalarisiz 147,1 trillion so‘mni tashkil etgan va bu 2021-yilning mos davriga nisbatan 31,1 trillion (26,8 foiz) so‘mga yuqori ko‘rsatkichdir.

Davlat budjetining 2022-yilning to‘qqiz oyidagi xarajatlari davlat maqsadli jamg‘armalarisiz 162,4 trillion so‘mni yoki YIMga nisbatan 26,4 foizni tashkil etdi.

Senat a’zolari muhokama jarayonida 2022-yilning 9 oyida davlat budjeti daromad va xarajatlarining ijrosi, ajratilgan mablag‘larning maqsadli sarflanishi, shuningdek, davlat budjeti daromadlari prognozining bajarilishida soliq va bojxona to‘lovlarining undiruvchanlik darajasiga ham e’tibor qaratdi.

Davlat mablag‘laridan foydalanish samaradorligi borasida qurilish sohasida o‘tkazilgan nazorat tadbirlarida haqiqatda bajarilmagan qurilish-ta’mirlash ishlarini hisobotlarga qo‘shib yozish, loyiha-smeta hujjatlarida qurilish materiallarini yuqori narxlarda ko‘rsatish kabi xato va kamchiliklar aniqlangani ta’kidlandi.

Ijtimoiy rivojlantirish borasidagi davlat dasturlarida belgilangan tadbirlarni moliyalashtirishga ajratilgan mablag‘larning maqsadli, o‘z muddatida va to‘liq o‘zlashtirilishida ham ayrim muammo va xatolar mavjudligi aytildi.