Қашқадарё вилоятининг Яккабоғ туманида фаолият юритувчи автоблогер Мақсуд Музаффаров таниш дўсти билан унинг автомобилида ЙТҲ содир бўлганини, бироқ рул бошқарувида у бўлмаса-да, ИИБ ходимлари уни айбдор қилишга уринишаётганини айтмоқда. Бу ҳақда блогер «Дарё» журналисти билан мулоқотида гапириб берди.
Кеча, 17 ноябрь куни биз билан боғлиқ нохуш ҳолат рўй берди. Менинг машинамни бошқариб кетаётган дўстим қоронғида олдидан чиқиб қолган одамни уриб юборди. Йўловчининг маст бўлгани ва пиёдалар ўтиши мумкин бўлмаган жойдан йўлни кесиб ўтгани дўстимни шошириб қўйди. Йўловчининг мастлигини шифокорлар ҳам тасдиқлади. Воқеа содир бўлгандан сўнг тезда йўловчига биринчи ёрдамни кўрсатиб, уни шифохонага олиб бордик. Беморнинг аҳволи яхши, — дейди блогер Мақсуд Музаффаров.Автоблогер автомобилининг уст қисми зарарланмагани, фақатгина олд ойнаси сингани беморга унчалик ҳам қаттиқ зарар етмаганидан далолат беришини айтмоқда.
Тўғри, ЙТҲ ҳар қандай ҳолатда ҳам ЙТҲ. Бироқ кўриб турганингиздек, машинанинг олд капоти зарарланмаган, фақат олд ойна синган. Бу йўловчига енгил жароҳат етганини англатади. Қолаверса, биз йўловчига тезда ёрдам кўрсатдик. Шундай бўлса-да, Яккабоғ туман ИИБ терговчилари тарихда бўлмаган текширувларни амалга ошириб, мени рулда эди деб кўрсатишга уринмоқда, — дейди автоблогер.Қўшимча қилинишича, ИИБ терговчиси Мақсуд Музаффаров ва унинг дўсти устидаги барча кийимларини ечиб олган ва текширмоқчилигини, шунингдек автомобиль ўриндиқларидаги қопламаларни ҳам олиб, Тошкентдаги экспертизага жўнатмоқчилигини билдирган.
Мен шу пайтгача ЙТҲлар содир бўлганини, ундан сўнг текширувлар бўлганини кўрганман, аммо автомобиль ичидаги одамлар кийимини ечиб олишганини, автомобиль ўрнидиғидаги қопламаларни Тошкентга юбориб, экспертизадан ўтказишлари кераклигини биринчи маротаба эшитиб турибман. Бу ҳаракатларнинг таг замирида мен рул бошқарувида бўлмасам-да, мени рулда эди деб кўрсатиш ва шу орқали менга босим ўтказишга уриниш деб ҳисоблайман, — дейди Мақсуд Музаффаров «Дарё» билан суҳбатида.Мазкур воқеа юзасидан Ички ишлар вазирлиги ахборот хизмати раҳбари Шоҳруҳ Ғиёсов ҳам расмий маълумот берди.
Жорий йилнинг 17 ноябрь куни соат 18:40 ларда, Қашқадарё вилояти Яккабоғ тумани «Айғиркўл» маҳалласи ҳудудидан ўтувчи 4К-347а автомобиль йўлида ҳаракатланиб кетаётган фуқаро Ш.М. бошқарувидаги Lacetti русумли давлат рақами 70U102UA транспорт воситаси пиёдалар ўтиши учун белгиланмаган жойдан йўлнинг қатнов қисмини кесиб ўтаётган фуқаро О.Л.ни уриб юбориб ЙТҲ содир этган. Жабрланувчи О.Л. «Бош мия чайқалиши, болдир суягининг ёпиқ синиб силжиши» ташхиси билан туман касалхонасига ётқизилган. Ҳозирда ҳолат юзасидан Яккабоғ туман ИИБ Тергов бўлими томонидан терговга қадар текширув ишлари олиб борилмоқда, — дейилади расмий ахборотда.Шоҳруҳ Ғиёсов, шунингдек, жамоатчиликдан мазкур ЙТҲни блогер Мақсуд Музаффаров билан боғлаш ҳамда ижтимоий тармоқларда асоссиз хабарларни тарқатиш ноўрин эканини таъкидлаган.
Эслатиб ўтамиз, Мақсуд Музаффаров жамоатчиликка ЙПХ ходимининг саводсизлигини исботлаб бериши, Қамашида ЙПХ инспекторини қоидабузарлиги учун жарима тўлашга мажбур қилгани ва Қашқадарё йўлларидаги қоидабузарликларни назорат қилишга келган самарқандлик ЙПХ ходимининг ўзи қоида бузганини исботлаб, унинг ҳам жаримага тортилишида ташаббус кўрсатгани билан жамоатчиликка яхши танилган.
Изоҳ (0)