Bosh vazir o‘rinbosari — investitsiyalar va tashqi savdo vaziri Jamshid Xo‘jayev Fransiyada yetakchi kompaniyalar rahbarlari bilan bir qator uchrashuvlar o‘tkazdi, deb xabar bermoqda vazirlik matbuot xizmati.
Xususan, Voltalia kompaniyasi bosh ijrochi direktori Sebastyan Klerk bilan O‘zbekistonda quyosh va shamol elektr stansiyalarini qurish bo‘yicha bir qator investitsiya loyihalarini amalga oshirishda kompaniyaning ishtirok etish istiqbollari muhokama qilindi.
Kompaniya rahbariyati, o‘z navbatida, O‘zbekistonda vakolatxona ochish va muqobil energetika obyektlarini qurishga qiziqish bildirdi.
Voltalia 2005-yilda tashkil etilgan Fransiya kompaniyasi bo‘lib, kompaniya obyektlarining umumiy quvvati 1,9 GVt va istiqbolli loyihalar portfeli 10,7 GVt dan oshadi. Voltalia dunyoning 20 mamlakatida faoliyat olib boradi.
Kompaniya butun dunyo bo‘ylab elektr energiyasini ishlab chiqarish quvvatlarini yaratish bilan birga, obyektlarning ishonchliligi va ish sifatining yuqori darajasini ta’minlash bo‘yicha katta tajribaga ega.
Orano Mining kompaniyasining bosh direktori Nikolya Meys bilan uchrashuvda esa tomonlar investitsiya hamkorligini kengaytirishning hozirgi holati va istiqbollarini muhokama qilgan.
Energetika sanoati uchun uskunalar ishlab chiqarishga ixtisoslashgan ushbu kompaniya rahbariyati o‘zaro hamkorlikni yanada rivojlantirishga qiziqish bildirdi. Shu munosabat bilan aniq loyihalarni muhokama qilish jarayonida O‘zbekiston tomoni mamlakatimizda qo‘shma loyihalarni amalga oshirishda investorlarga to‘liq yordam ko‘rsatishga tayyorligini ta’kidladi.
Bundan tashqari, Alstom kompaniyasining bosh direktori Anri Pupar-Lafarj bilan shahar jamoat transportini tashkil etish sohasida kompaniyaning yechimlarini joriy qilish imkoniyatlari ko‘rib chiqilgan.
1928-yilda tashkil etilgan Alstom temir yo‘l transporti ishlab chiqaradigan eng yirik mashinasozlik kompaniyalaridan biridir. Uning shtati taxminan 74 ming kishini tashkil qiladi. Shuningdek, kompaniya transport va yo‘lovchilar oqimini raqamli boshqarish bo‘yicha yechimlarni ishlab chiqmoqda. Kompaniya dunyoning 70 mamlakatida amalga oshirgan sotuv savdo aylanmasining hajmi 2021-yilda 15,5 milliard yevroni tashkil etdi.
Izoh (0)