Namangan viloyati Pop tumani hududidan o‘tuvchi A-373 Toshkent–O‘sh avtomobil yo‘lida 18-noyabr kuni DAF yuk avtomobili ag‘darilib ketdi. Bu haqda viloyat yo‘l harakati xavfsizligi boshqarmasi xabar berdi.
Qayd etilishicha, soat 19:25 da yo‘lning 229-kilometrida Toshkent–vodiy yo‘nalishida harakatlangan DAF yuk avtomobili haydovchisi boshqaruvni yo‘qotishi oqibatida transport vositasi yo‘lning o‘ng tomoniga ag‘darilgan va yo‘lni berkitib, shu yo‘nalishdagi harakatni to‘xtatib qo‘ygan.
Voqea joyiga zudlik bilan FVVning “Qamchiq” qutqaruv guruhi hamda YPX xodimlari yetib kelgan. Hodisa oqibatlari maxsus texnikalar yordamida bartaraf qilingan. Hodisa oqibatida tan jarohati olganlar yo‘q. Dovon yo‘li transportlar harakati uchun ochiq, ikki tomonlama harakat davom etmoqda.
Mazkur holat yuzasidan tuman FVB va YHXB xodimlari tomonidan surishtiruv harakatlari olib borilmoqda.
Mavzuga doir:
Izoh (0)