Polshaga tushgan raketa: Varshava tergovning dastlabki tafsilotlarini e’lon qildi

Polsha 15-noyabr kuni mamlakatga kelib tushgan raketalar bo‘yicha olib borgan dastlabki tekshiruvini e’lon qildi. Bu haqda “Yevropeyskaya Pravda” xabar berdi.

Hodisa yuz bergan joyda voqealar ketma-ketligini ko‘rsatadigan ma’lum dalillar aniqlandi. Polsha prezidenti huzuridagi Xalqaro siyosat byurosi rahbari Yakub Kumox bu bo‘yicha ma’lumot beradi.

“Mavjud dalillardan birida Rossiya raketasini urib tushirishi kerak bo‘lgan raketalardan biri nishonga tegmagani, o‘zini yo‘q qilish tizimi ishlamay qolgani va u fojiaga sabab bo‘lgani keltirilgan”, — dedi Kumox.

Ta’kidlanishicha, hozirda voqea joyida Polsha va Amerika tergov guruhi ishlamoqda, ukrainaliklar ham jarayonga qo‘shilishni so‘ragan.

“Agar ikkala tomon ham rozi bo‘lsa va Amerika tomonida hech qanday e’tiroz bo‘lmasa, yaqin kelajakda Ukrainaning tergovga qo‘shilishiga ruxsat berilishi mumkin. Agar tergov guruhida texnik darajada ogohlantirish bo‘lmasa, u holda Ukrainaning tergovga kirishini rad etishga sabab bo‘lmaydi”, — deydi Polshaning Xalqaro siyosat byurosi rahbari.

Tergovda qanday dalil bor, degan savolga rasmiy shunday javob berdi: “Raketa parchalari, krater chuqurligi, mutaxassislar raketa qaysi yo‘nalishdan uchganini, hatto sarflagan yonilg‘i miqdorini ham hisoblab chiqmoqda”.  Kumox hech kim Ukrainani Polsha hududini ataylab bombardimon qilganlikda ayblamasligini ta’kidladi.

“Rossiya o‘sha kuni Ukrainani bombardimon qildi. Shu uchun Rossiya javobgarlikni o‘z zimmasiga oladi. Bu holat odam yo‘lga chiqib, avtomobil va avtobus to‘qnashuviga sabab bo‘lgan vaziyatni eslatadi. Mashina aybdormi? Yo‘q, yo‘lga chiqqan va avariyaga sababchi bo‘lgan shaxs aybdor”, — deya qo‘shimcha qildi rasmiy.

Polshaga tushgan raketalar tafsilotlari

15-noyabr kuni Ukrainaning Kiyev shahri va bir qator viloyatlariga 80 dan ortiq raketa uchirildi. Holat yuzasidan prezident Zelenskiy aholiga boshpanalarda qolishni so‘radi. Shu kuni Polshaga ikkita raketa tushdi va hodisada ikki kishi o‘ldi. Polsha bosh vaziri tunda Vazirlar Kengashining Milliy xavfsizlik va mudofaa qo‘mitasini chaqirdi. Havoga qiruvchi samolyotlar ko‘tarildi. Polsha prezidenti raketalarning Ukrainaga tegishli bo‘lishi mumkinligini aytdi. NATO bosh kotibi ham shunday fikr bildirdi, ammo bunda Kiyev emas, Rossiya javobgarligini ta’kidladi. Zelenskiy esa raketalar Ukrainaga emas, balki Rossiyaga tegishli ekanini e’lon qildi hamda Polshadan tergovga qo‘shilishni talab qildi. Germaniya va Britaniya raketalar Polshaga “Putin urushi” sabab tushganini ma’lum qildi.

O‘z navbatida, Oq uy bayonot bilan chiqib, tergov natijalaridan qat‘iy nazar hodisada Rossiya javobgarligini e’lon qildi. Bayden esa Zelenskiyning Polshaga qulagan raketalar haqidagi bayonotida dalil yo‘qligini aytdi.