“Bu safar nima bo‘lganini bilmaymiz” — Zelenskiy Polsha hududiga tushgan raketalar haqida

Ukraina prezidenti Vladimir Zelenskiy 15-noyabr kuni Polsha hududiga tushgan raketa parchalarining qaysi tomonga tegishli ekanligi haqida aniq fikrni aytishning imkoni yo‘qligini ta’kidladi, deb yozadi “RBK”.

“Bu safar nima bo‘lganini bilmaymiz, ishonchimiz komil emas, menimcha, dunyo ham 100 foizlik ma’lumotga ega emas. Ammo aniq bilamanki, Rossiyaning raketalari ham bor edi, biz dushmanning havo hujumiga qarshi mudofaa raketalaridan foydalanganmiz”, — dedi u va Polshaga qaysi raketa tushganini aytish uchun tergov tugashini kutishga chaqirdi.

Avvalroq Zelenskiy Polshaga tushgan raketalar Rossiyaga tegishli ekaniga to‘la ishonishini aytgan edi. Biroq Polsha va AQSH buni rad etdi. Rossiya tomonining ma’lum qilishicha, qulagan raketaning qoldiqlari “Ukraina harbiy havo kuchlarining S-300 havo mudofaa tizimining zenit raketasining elementlari” hisoblanadi.

Raketalarning qulashi natijasida ikki kishi halok bo‘lgan. Hodisa joyi esa Polsha—Ukraina chegarasi yaqinidagi Prjevodov qishlog‘idir. Zelenskiyning eslashicha, bu holat birinchisi emas: oktabr oyi oxirida Ukraina havo mudofaasi tomonidan urib tushirilgan raketa Moldovada qulagan.

15-noyabr kuni Polshaning Ukraina bilan chegaradosh Pshevodov qishlog‘iga raketalar qulagan, oqibatda 2 kishi halok bo‘lgan edi. Bu voqea Ukraina hududi ommaviy raketa zarbalariga uchragan kuni yuz berdi.

Dastlab Associated Press agentligi Amerika razvedkasidagi manbaga tayanib, Polshaga qulagan raketalar Rossiyaga tegishli bo‘lishi mumkinligi haqida xabar bergandi. Polsha Tashqi ishlar vazirligi ham ularning “Rossiyada ishlab chiqarilgan”ini tasdiqlagan. Shu bilan birga, Polsha prezidenti Anjey Duda Varshavada raketalarni kim uchirgani haqida ma’lumot yo‘qligini ta’kidladi.

Pentagon matbuot kotibi Pet Rayder jurnalistlarga raketalarning kimga tegishli ekanini hali tasdiqlay olmasligini aytgan. AQSH prezidenti Jo Bayden ham ularning Rossiyadan uchirilgani hozircha rad etilayotgani haqida gapirdi.

Keyinroq AP 3 nafar amerikalik rasmiyga tayanib, Polshada qulagan raketalar Rossiya raketalarini urib tushirish uchun Ukraina Qurolli kuchlari tomonidan otilgan, deb xabar berdi.

O‘z navbatida, Rossiya Mudofaa vazirligi ham raketalar Ukraina armiyasiga qarashli deb da’vo qilmoqda.