Rossiyada safarbarlik bilan bog‘liq holda yuzaga kelayotgan ishchi kuchi tanqisligi sabab Moskva muhim sohalarda ishlayotgan o‘zbek muhojirlari uchun kvotani bekor qildi.
2021-yildan beri amalda bo‘lgan kvota O‘zbekistondan faqat 11 ming ishchiga uyushgan migratsiya sxemalari doirasida qurilish va agrosanoat sohalarida ishlash imkonini berardi. 10-noyabr kuni Rossiya hukumati uni bekor qildi.
Kvotalar bir martalik asosda yollangan millionlab oddiy ishchilarga taalluqli emas. Rossiyada ikki millionga yaqin o‘zbekistonlik ishlayotgani taxmin qilinadi.
Endi esa Rossiya prezidenti Vladimir Putinning Ukrainadagi urushga erkaklarni safarbar qilish haqidagi buyrug‘i bilan yuzaga kelgan ishchi kuchi tanqisligini bartaraf etish maqsadida o‘zbek muhojirlarini jalb qilish uchun ushbu kvotalar olib tashlanmoqda.
“Rossiya sanoat korxonalarining uchdan bir qismi rekord darajadagi ishchi kuchi yetishmasligiga duch kelishi mumkin”, — deb yozadi “Kommersant” nashri Gaydar nomidagi Iqtisodiy siyosat instituti ekspertlariga tayanib. Hisobotda aytilishicha, Rossiya mehnat bozori 1993-yildan beri eng katta tanqislikni boshdan kechirmoqda.
Moskva, shuningdek, ishchilardan Covid-19 ga qarshi emlanganlik sertifikati yoki manfiy test natijasini taqdim etish talabini bekor qildi.
Putinning safarbarlik haqidagi buyrug‘idan oldin ham o‘zbekistonlik quruvchilar uchun ajratilgan kvotaning yarmidan kamrog‘i bajarilgan edi. 13,5 ming malakali ishchiga kvota ajratilgan bo‘lsa-da, sentabr oyining boshlarida Rossiyada faqat 4,5 ming kishi ishlagan.
Rossiya markaziy osiyolik muhojirlarni Ukraina bilan urushga jalb qilishga urinayotgani haqidagi xabarlar ham ularni Rossiyaga borish masalasida o‘ylantirmoqda.
“Rosstat” ma’lumotlariga ko‘ra, o‘zbekistonliklar Rossiyada qolishga avvalgiga qaraganda kamroq qiziqish bildirmoqda. 2021-yilning sakkiz oyida O‘zbekistonning 35,7 ming fuqarosi Rossiyaga kirgan, 19,9 ming kishi esa chiqib ketgan. Joriy yilning xuddi shu davrida 33,9 ming kishi mamlakatga ko‘chib o‘tgan bo‘lsa, undan ancha ko‘proq — 47,6 kishi chiqib ketgan.
Urush oqibatida Jahon banki bu yil muhojirlarning pul o‘tkazmalari keskin kamayishini prognoz qilmoqda. Markaziy Osiyodagi oilalarning ko‘pchiligi bu o‘tkazmalarga qaram.
May oyida Rossiyadan O‘zbekistonga pul o‘tkazmalari 21 foizga, Tojikistonga 22 foizga va Qirg‘izistonga 32 foizga qisqarishi taxmin qilingandi. O‘tgan yili O‘zbekistonga pul o‘tkazmalari yalpi ichki mahsulotning 13 foizdan ortig‘ini tashkil etdi; Jahon banki ma’lumotlariga ko‘ra, Tojikiston va Qirg‘iziston uchun bu ko‘rsatkich YIMning taxminan uchdan bir qismini tashkil qilgan.
Markaziy osiyolik muhojirlar Rossiyadan boshqa davlatlarda ham omadini sinab ko‘rmoqda, ayrimlar Brexit bilan bog‘liq ishchi kuchi tanqisligini to‘ldirish uchun bu yozda Buyuk Britaniyada meva-sabzavotlar yig‘ish bilan shug‘ullangan.
Izoh (0)