Польшага тушган ракета: Варшава терговнинг дастлабки тафсилотларини эълон қилди

Польша 15 ноябрь куни мамлакатга келиб тушган ракеталар бўйича олиб борган дастлабки текширувини эълон қилди. Бу ҳақда «Европейская Правда» хабар берди.

Ҳодиса юз берган жойда воқеалар кетма-кетлигини кўрсатадиган маълум далиллар аниқланди. Польша президенти ҳузуридаги Халқаро сиёсат бюроси раҳбари Якуб Кумох бу бўйича маълумот беради.

«Мавжуд далиллардан бирида Россия ракетасини уриб тушириши керак бўлган ракеталардан бири нишонга тегмагани, ўзини йўқ қилиш тизими ишламай қолгани ва у фожиага сабаб бўлгани келтирилган», — деди Кумох.

Таъкидланишича, ҳозирда воқеа жойида Польша ва Америка тергов гуруҳи ишламоқда, украиналиклар ҳам жараёнга қўшилишни сўраган.

«Агар иккала томон ҳам рози бўлса ва Америка томонида ҳеч қандай эътироз бўлмаса, яқин келажакда Украинанинг терговга қўшилишига рухсат берилиши мумкин. Агар тергов гуруҳида техник даражада огоҳлантириш бўлмаса, у ҳолда Украинанинг терговга киришини рад этишга сабаб бўлмайди», — дейди Польшанинг Халқаро сиёсат бюроси раҳбари.

Терговда қандай далил бор, деган саволга расмий шундай жавоб берди: «Ракета парчалари, кратер чуқурлиги, мутахассислар ракета қайси йўналишдан учганини, ҳатто сарфлаган ёнилғи миқдорини ҳам ҳисоблаб чиқмоқда».  Кумох ҳеч ким Украинани Польша ҳудудини атайлаб бомбардимон қилганликда айбламаслигини таъкидлади.

«Россия ўша куни Украинани бомбардимон қилди. Шу учун Россия жавобгарликни ўз зиммасига олади. Бу ҳолат одам йўлга чиқиб, автомобиль ва автобус тўқнашувига сабаб бўлган вазиятни эслатади. Машина айбдорми? Йўқ, йўлга чиққан ва аварияга сабабчи бўлган шахс айбдор», — дея қўшимча қилди расмий.

Польшага тушган ракеталар тафсилотлари

15 ноябрь куни Украинанинг Киев шаҳри ва бир қатор вилоятларига 80 дан ортиқ ракета учирилди. Ҳолат юзасидан президент Зеленский аҳолига бошпаналарда қолишни сўради. Шу куни Польшага иккита ракета тушди ва ҳодисада икки киши ўлди. Польша бош вазири тунда Вазирлар Кенгашининг Миллий хавфсизлик ва мудофаа қўмитасини чақирди. Ҳавога қирувчи самолётлар кўтарилди. Польша президенти ракеталарнинг Украинага тегишли бўлиши мумкинлигини айтди. НАТО бош котиби ҳам шундай фикр билдирди, аммо бунда Киев эмас, Россия жавобгарлигини таъкидлади. Зеленский эса ракеталар Украинага эмас, балки Россияга тегишли эканини эълон қилди ҳамда Польшадан терговга қўшилишни талаб қилди. Германия ва Британия ракеталар Польшага «Путин уруши» сабаб тушганини маълум қилди.

Ўз навбатида, Оқ уй баёнот билан чиқиб, тергов натижаларидан қатъий назар ҳодисада Россия жавобгарлигини эълон қилди. Байден эса Зеленскийнинг Польшага қулаган ракеталар ҳақидаги баёнотида далил йўқлигини айтди.