Дизайнер Том Форд Estée Lauder билан келишувдан сўнг миллиардерга айланади

Тоm Ford’нинг косметика гиганти Estée Lauder’га сотилиши бренд асосчиси Том Фордни миллиардерга айлантиради. Бу ҳақда Forbes хабар бермоқда.

Американинг Forbes нашри маълумотларига кўра, келишувдан сўнг Форднинг бойлиги 1,2 миллиард долларга баҳоланиши мумкин.

Estée Lauder келишуви Тоm Ford брендини 2,8 миллиард долларга баҳолаган. 2013 йилда чоп этилган ҳужжатларга кўра, Форд компаниянинг деярли 64 фоизига эгалик қилган ва шундан бери унинг улуши ўзгармаган.

Бутун компания баҳосига кўра, дизайнернинг улушини 1,1 миллиард долларга баҳолаш мумкин. Бундан ташқари, Форд Лос-Анжелес ва Нью-Йоркдаги камида 65 миллион долларлик иккита уйга эгалик қилади.

Форддан ташқари, бошқа инвесторлар ҳам бренд ва модалар уйида улушларга эга. Масалан, Италиянинг ҳашаматли товарлар сотувчиси Zegna тахминан 345 миллион долларлик 15 фоиз улушга эга.

Форднинг узоқ йиллик бизнес шериги Доменико Де Соле компаниянинг 11 фоиздан сал кўпроқ улушига эгалик қилади, бу улуш ҳозирда 259 миллион долларга баҳоланмоқда.

Португалиянинг Grupo Americo Amorim конгломерати қолган 10 фоизга эгалик қилади, бу ҳозирда 230 миллион долларга тенг.

Охирги йиллик ҳисоботга кўра, Zegna бренднинг кийим-кечак ва аксессуарларини ишлаб чиқариш учун узоқ муддатли лицензияни сақлаб қолади.

2021 йилда Тоm Ford 1,7 миллиард долларлик савдодан 96 миллион доллар фойда кўрганини маълум қилган. Бренднинг олдинги икки йиллик фойда ҳажми келтирилмаган.

Ҳозирда Тоm Ford’нинг турли мамлакатларда, жумладан, Хитой, Италия, Япония, Швейцария ва Бирлашган Араб Амирликларида 98 та дўкони мавжуд.

Estée Lauder 15 ноябрь куни премиум кийим-кечак, пойабзал, парфюмерия ва аксессуарлар брендини сотиб олганини эълон қилди.

Бренд ва модалар уйи 2,8 миллиард долларга баҳоланди, Estée Lauder шартнома шартларига кўра тахминан 2,3 миллиард доллар нақд пул ва қарзни тўлаган.

Шунингдек, 2025 йил июль ойидан бошлаб 300 миллион долларга кечиктирилган тўловларни имзолаган. Битим 2023 йилнинг биринчи ярмида якунланиши кутилмоқда.

Шартнома баёнотига кўра, Форд 2023 йил охиригача бренднинг «ижодий юзи» бўлиб қолади.