“Yuragining o‘ng bo‘lmachasida defekt aniqlangan”. Mudofaa vazirligi qarshilik askarning o‘limi sababini ma’lum qildi

Qashqadaryo viloyatining Qarshi shahrida yashovchi askar yigit Termiz shahridagi xizmati davomida vafot etgani va uyiga o‘lik holda qaytgani haqida xabar berilgandi. Mudofaa vazirligi askar yigit o‘limiga yuragidagi nuqsoni sabab bo‘lganini bildirdi.

Termizdagi harbiy qismlarning birida xizmat qilayotgan oddiy askar K.Q. sog‘lig‘i bo‘yicha shikoyat qilganligi sababli 11-noyabr kuni Markaziy harbiy klinik gospitalga yotqizilgan. Tibbiy tekshiruvlar natijasida bemor K.Q.da yurakning o‘ng bo‘lmachasida kontrast to‘ldirish defekti (tromb), ko‘ks oralig‘ida hajmli hosila, ikki tomonlama gidrotoraks aniqlangan. 14-noyabr kuni bemor shoshilinch ravishda American Hospital klinikasida kardioxirurg konsultasiyasiga olib borilgan.

Bemor hayoti uchun tashxis va jarrohlik operatsiyasi o‘ta xavfli hisoblanadi. Ammo hayotiy ko‘rsatmalarga asosan jarrohlik operatsiyasini bajarish lozimligi sababli klinikada gospital mutaxassislari ishtirokida jarrohlik operatsiyasi o‘tkazilgan. Bemorning umumiy ahvoli o‘tkazilgan jarrohlik operatsiyasiga mos ravishda og‘irligicha qolgan. O‘tkazilgan reanimatsion chora-tadbirlarga qaramasdan bemorda biologik o‘lim qayd etilgan, — deyiladi Mudofaa vazirligi Axborot va ommaviy kommunikatsiyalar departamenti bergan ma’lumotda.Askar yigitning o‘limi haqida jamoatchilikka xabar bergan bloger Azizbek Yazdurdiyev marhum yigit harbiy orkestrda xizmat qilgan bo‘lishi mumkinligini aytgandi.

Ikki kun ilgari uydagilariga qo‘ng‘iroq qilib, pul kerakligini, uzoqroq joyga ketishayotganini aytgan ekan. Rahmatli qo‘li gul sartarosh, musiqa asboblarini chala oladigan darajada san’atkor yigit edi, — degandi Azizbek.

Marhum 15-noyabr kuni o‘zi yashovchi “Gulshan” mahallasidagi xonadoniga olib kelingan.

Mavzuga doir: Qashqadaryoda harbiy xizmatga borgan 18 yoshli yigit uyiga o‘lik holda qaytdi