14-noyabr kuni Saida Mirziyoyeva Prezident administratsiyasining Kommunikatsiyalar va axborot siyosati bo‘yicha sho‘ba mudiri lavozimiga tayinlandi.
Prezident farmoyishi bilan Saida Mirziyoyeva Prezident administratsiyasi Ijro etuvchi apparatining Kommunikatsiyalar va axborot siyosati bo‘yicha sho‘ba mudiri lavozimiga tayinlandi. Shuningdek, u ijtimoiy soha, madaniyat va ta’lim sohalaridagi islohotlar ijrosining borishini ham nazorat qiladi.
Ta’kidlanishicha, ushbu sho‘ba yangidan tuzilgan bo‘lib, Prezident administratsiyasi rahbarining jamoatchilik fikrini o‘rganish va axborot siyosati uchun mas’ul o‘rinbosari tizimi tarkibiga kiradi.
Jahon iqtisodiyoti va diplomatiya universiteti bitiruvchisi, Toshkent davlat yuridik universiteti, Lomonosov nomidagi Moskva davlat universiteti magistri, iqtisodiyot fanlari nomzodi Saida Mirziyoyeva yillar davomida turli sohalarda, 2019−2020-yillarda Prezident administratsiyasi huzuridagi Axborot va ommaviy kommunikatsiyalar agentligi direktorining o‘rinbosari, 2020-yildan bugungi tayinlovga qadar Milliy mass-mediani qo‘llab-quvvatlash va rivojlantirish fondi Vasiylik kengashi raisining o‘rinbosari lavozimlarida faoliyat yuritgan.
Saida Mirziyoyeva faoliyati davomida O‘zbekistonda ommaviy axborot vositalarini rivojlantirish, so‘z erkinligini ta’minlashga qaratilgan islohotlarni hayotga joriy etish bo‘yicha ko‘plab samarali loyihalarni amalga oshirdi. Shu bilan birga, mamlakatdagi ko‘plab ijtimoiy loyihalar tashabbuskori bo‘ldi.
Jumladan, ko‘zi ojiz bolalarni qo‘llab-quvvatlash hamda ularni Brayl yozuvida chop etilgan o‘quv, badiiy, ilmiy va boshqa zarur adabiyotlar bilan ta’minlashga qaratilgan “Ko‘ngil ko‘zi” loyihasi faoliyatini kengaytirishda faol ish olib bordi.
2020-yili Dubayda bo‘lib o‘tgan Xalqaro ayollar forumida Saida Mirziyoyeva o‘zining nutqi bilan qatnashib, ayollar huquqlari bo‘yicha bir qator muhim fikrlarni ilgari surdi.
Shuningdek, mamlakatning xalqaro imijini ko‘tarish va O‘zbekiston san’atini jahon miqyosida keng targ‘ib qilish bo‘yicha Madaniyat va san’atni rivojlantirish jamg‘armasi bilan hamkorlikda tarixda ilk bor Parij javohiri, dunyo madaniyati va san’atining eng nodir namunalarini o‘zida jamlagan Luvr muzeyida O‘zbekiston madaniy meroslariga bag‘ishlangan ko‘rgazma tashkil etish kabi yirik loyihalarni amalga oshirishda faol qatnashib kelmoqda.
Bundan tashqari, gender tenglik masalalari, O‘zbekiston va Markaziy Osiyo mintaqasida ayollarning huquq va imkoniyatlarini mustahkamlashga doir keng ko‘lamli ko‘plab loyihalarni amalga oshirdi.
O‘tgan 2021-yilda “Zakovat” loyihasini yangi pog‘onaga ko‘tarish maqsadida “Zakovat” intellektual klubi va uning turnirlarini tashkil etishda faol qatnashdi. Buning ortidan yurtimizdagi bilimga chanqoq minglab yoshlar “Zakovat” o‘yinlari atrofida birlashdi.
2021-yilda Saida Mirziyoyeva boshchiligidagi Madaniyat va san’atni rivojlantirish jamg‘armasi tomonidan Jahon merosi ro‘yxatiga kiritilgan lazgi raqsi balet ko‘rinishida sahnalashtirildi.
Endilikda Saida Mirziyoyevaning Prezident administratsiyasidagi Kommunikatsiyalar va axborot siyosati bo‘yicha sho‘ba mudiri lavozimga tayinlanishi katta ahamiyat kasb etadi. Chunki u hukumat va jamiyat o‘rtasida ko‘prik vazifasini bajarib, jamoatchilik fikrini o‘rganish va axborot siyosati uchun mas’ul bo‘ladi. Bunday mas’uliyatli vazifalarni bajarishda unga avvalgi lavozimlarida to‘plagan tajribalari katta yordam berishi aniq.
Xulosa o‘rnida aytishimiz mumkinki, aynan xalq dardiga quloq tutish, xalq bilan muloqot prezident Shavkat Mirziyoyev tomonidan ustuvor vazifa sifatida belgilab o‘tilgan. OAVga so‘nggi yillarda berilgan erkinlik, jumladan Saida Mirziyoyeva rahbarligida Milliy mass-mediani qo‘llab-quvvatlash va rivojlantirish jamoat fondi tomonidan amalga oshirilgan bu boradagi ishlarning natijasini payqash qiyin emas. Shunga qaramay qilinishi kerak bo‘lgan ishlar hali yetarli. Saida Mirziyoyevaning nodavlat tashkilotidan davlat tashkilotiga o‘tishi esa ushbu o‘zgarishlarni yanada jadallashtirish imkonini beradi.
Izoh (0)